Џонсон во Брисел во обид за откочување на преговорите за Брегзит

Британскиот премиер Борис Џонсон денеска доаѓа во посета на Брисел на разговори за пост-Брегзит договор со претседателката на Европската комисија, Урсула вон дер Лејен. Има големи несогласувања за рибарските права, правилата за фер трговија и за тоа како ќе биде спроведен договорот.

Британски претставници велат дека напредок на политичко ниво може да ги откочи преговорите меѓу главниот преговарач на ЕУ Мишел Барние и британскиот преговарач Дејвид Фрост.

Извор од британската влада вели дека е важно да се биде „реалистичен“ дека можеби нема да може да се постигне договор до 31 декември кога Велика Британија треба да го заврши излегувањето од ЕУ и нема да биде обврзана да се придржува до европските трговски регулативи.

Пред посетата на Брисел, Џонсон пред парламентот кажа дека ниеден британски премиер не може да ги прифати барањата на кои ЕУ „инсистира во моментов“, додавајќи дека земјата ќе напредува дури и без потпишан трговски договор со Унијата.

Континуираните несогласувања, и покрај осуммесечните преговори меѓу Барние и Фрост ги зголемија стравувањата за, според многу фирми, најлошото сценарио за излез од ЕУ без договор кој треба да ја регулира годишната трговија од околу 1 билион долари.

Дел од довербата беше обновен вчера, кога Британија и Унијата постигнаа договор „во принцип“ за специфичните трговски аранжмани во Северна Ирска.