Влада - Набавените ПЦР тестови се за итни патувања
Владата реагира во врска со написите за набавката на ПЦР тестови од страна на Службата за општи и заеднички работи за вработените во Владата. Во владиното соопштение се наведува дека тестовите се неопходни во ситуации кога членови на Владата имаат потреба од итно службено патување во странство, а за кои тестирања, како што стои во соопштението, нема можности за закажување тест преку матичен лекар.
На тендерот се пријавиле четири фирми и иако тендерот бил отворен за сите, се пријавиле само приватни лаборатории, а избрана е фирмата со најниска цена.
„Тестовите што ги прави Институтот за јавно здравје се бесплатни за граѓаните, но не и за институциите на државата која ги плаќа по пазарна цена“, стои во соопштението.
Владата приватно ќе се тестира на ковид-19
Претходно денеска Радио Слободна Европа објави дека Владата преку тендер си набавила 260 молекуларни тестови за детектирање на ковид-19 за потребите на своите вработени. За еден тест се издвоени 1900 денари, а вкупно тие чинеле околу 8000 евра. Договорот со приватната лабораторија Авицена е потпишан пред 12 дена.
Службата за општи и заеднички работи на Владата парите за тестовите ги обезбедила со ребалансот на буџетот за 2020 година, а причината е влошената ситуација со пандемијата.
„Со оглед на моменталниот огромен, неочекуван и непропорционален раст на бројките на новозаразени, хоспитализирани и смртни случаи и есенскиот бран на епидемијата со корона вирусот која не стивнува, а ги надмина во секој можен поглед очекувањата и проекциите на надлежните институции за справување со корона вирусот, Договорниот орган се соочи со потребата од непланирани, зголемени и дополнителни активности за превенција од ширење на болеста КОВИД-19 (корона вирус), а заради заштита на здравјето на луѓето“, се наведува во тендерската документација.
Денеска, пак, премиерот Зоран Заев, одговарајќи на новинарски прашања за време на посетата на Тетово, рече дека не е запознаен до договорот за набавка на ПЦР тестовите. Но и да е склучен договор, според него, веројатно има причина зошто е тоа сторено. Тој рече дека имаат целосна доверба во Институтот за јавно здравје и во сите здравствени институции и дека за власта државните институции се примат.
„Подобро здравство од јавното здравство нема“, рече Заев.