3.000.000 денари помош од Скопје за Петриња

Советот на Град Скопје, на денешната вонредна седница, донесе Одлука за давање помош на настраданите од катастрофалните земјотреси во Петриња и во Загреб, во кои има човечки жртви и се повредени повеќе лица, iнформираше денеска Град Скопје.

„Со оваа одлука, како израз на солидарност за настраданите, Градот Скопје дава помош во износ од 3 милиони денари, односно 2 милиона денари на градот Петриња и еден милион денари за градот Загреб, износ кој го доделуваме на сите градови за вакви и слични неприлики“, соопшти Градот.

Нова серија земјотреси во централна Хрватска, 2 јануари ден на жалост

Скопскиот градоначалник, Петре Шилегов, на седницата изјави дека Скопје е град на солидарноста и знае што значи помош по вакви катастрофи и затоа во кординација со сите советнички групи во Град Скопје била свикана вонредна седница на Советот за да им се додели помош на пријателите од Загреб и од Петриња.

Во вчерашниот земјотрес со јачина од 6,3 степени по Рихтер, со епицентар во градот Петриња, а од кој имаше последици и во Загреб и Сисак, загинаа најмалку седум лица, а дваесетина се повредени. Спасувачките екипи се на терен, а помош за настраданите стасува од целиот регион и од земјите од Европската унија. Македонската Влада вчера објави дека за помош на настраданите ќе испрати 6 милиони денари.