ВМРО-ДПМНЕ: Списокот на Каракачанов е лага и гума за спасување на Заев
ВМРО-ДПМНЕ најостро ги демантира лагите кои Красимир Каракачанов ги објавува на својот фејсбук профил. Ниту еден од посочените функционери на ВМРО-ДПМНЕ нема бугарски пасош, што само покажува дека неговата денешна објава е класична лажна вест, реагираа денеска од Центарот за комуникации на ВМРО-ДПМНЕ, откако бугарскиот вицепремиер на својот официјален фејсбук профил објави 20-ина имиња на функционери од македонската опозициска партија кои, според него, имаат бугарски пасоши.
„Деновиве ги ископав веб-страниците на бугарските општини и доволно е да се погледне објавениот список на избирачи за да се најдат многу интересни имиња, сите луѓе од Македонија, кои стекнаа бугарско државјанство врз основа на декларираното бугарско потекло и се идентификуваа како етнички Бугари“, напиша Каракачанов на Фејсбук и ги наведува имињата на „Антонијо Милошоски, Александар Николоски, Никола Мицевски, Марија Андоновска, Петар Богојески, Александар Пандов, Филип Петровски...“.
Скопје на изјавите од Софија - аргументирано или остро?
Од ВМРО-ДПМНЕ реагираат дека „во ова е замешан премиерот Зоран Заев“.
„Она кое што е симптоматично е што ваквата објава доаѓа токму во време кога владата на Заев, кој самиот има изјавено дека го смета Каракачанов за пријател, се дави во огромни скандали. Ова покажува дека Зоран Заев освен што е во коалиција со мафијата во Македонија е во блиска коалиција и со сите негаторски и антимакедонски сили. Секогаш кога Заев е загрозен од некој скандал, се појавува некој лик како Красимир Каракачанов да му фрли гума за спасување. Но да им порачаме и на Каракачанов и на Заев дека оваа фрлена гума е од самиот старт издишана и не поминува во јавноста“, стои во реакцијата на ВМРО-ДПМНЕ.
За Заев и Димитров потегот на Каракачанов е предизборен фолклор
Претходно во врска со ова реагираше и пратеникот и портарол на СДСМ, Костадин Костадинов.
„Не е проблем што половина раководство и пратенички состав на ВМРО-ДПМНЕ, од Антонио Милошоски до Бојан Стојановски, Александар Николовски, потпишале изјава дека се бугарски производ и земале бугарско државјанство. Проблем е што глумат загрижени и поголеми македонци од нас, кои немаме резервна татковина, за разлика од нив“, објави Костадинов.