Одложувањето на пописот оставено за утре

Во Собрание вечерва нема да се одржи седница за измените на Законот за попис, со кој тој треба да се одложи за септември, како што претходно се договорија лидерите на СДСМ и на ВМРО-ДПМНЕ, Зоран Заев и Христијан Мицкоски. Според законот кој се уште е во сила пописот на населението треба да започне утре и да трае до 21 април. Заев и Мицкоски на лидерска средба во понеделикот се договорија пописот да се одржи од петти до 30 септември.

Нема услови денеска да се одржи седница на Собранието за одложување на пописот. Ова е епилогот од попладневната координација кај претседателот на Собранието Талат Џафери, информираат од пратеничките групи.

Според нив, доколку се создадат услови, седницата ќе се одржи утре.

Против одржувањето на седницата, како што велат, бил координаторот на пратеничката група Алијанса за Албанците Алтернатива зашто сметал дека одложувањето на пописот за септември не е поради актуелната здравствена состојба, туку дека станува збор за политичка одлука.

Одложувањето на пописот може и да не оди лесно

Џафери претходно рече дека не може да каже кога ќе бидат донесени измените на Законот за попис зашто има процедури што треба да се испочитуваат. Мора да бидат запазени сите постапки, нагласи и информира дека од формален аспект предлозите ги вратил до предлагачите, од каде очекува во најбрз рок да ги вратат повторно во Собранието.