Пендаровски- ми треба уште еден допис за тоа на кого да му дадам мандат
Претседателот на државата Стево Пендаровски очекува предавањето на мандатот на новиот мандатар да се случи следниот вторник или среда. Тој вечерва изјави дека до него е стигнат дописот од Собранието за оставката на Заев, но рече дека му е потребен уште еден допис од партијата која има мнозинство за да може да го даде мандатот.
“Денеска попладне до мојот Кабинет стигна допис од спикерот Талат Џафери дека Заев поднел оставка и цела влада е во оставка. Откако јас го добивам известувањето почнуваат да течат тие десет дена во кои сум должен да го дадам мандатот. Од денес попладне почна да тече тој рок. Ми треба уште еден допис, кому да го дадам мандат. Не можам да нагаѓам, морам да добијам допис од партија или партии кои треба да кажат ние имаме мнозинство и тој и тој е мандатар. Јас не можам да го дадам мандатот на СДСМ, морам да знам кому го давам како личност, конкретно на некој човек“, истакна Пендаровски во вечерашното гостување на телевизија Канал 5.
Претседателот Пендаровски го примил известувањето за оставката на Заев
На новиот претседател на СДСМ Димитар Ковачевски, за кого се пишува дека ќе биде новиот мандатар, според Пендаровски, треба да му се даде шанса. Ковачевски, рече Пендаровски, е голема непознаница во политиката затоа што не бил на позиција претходно, но треба да му се даде шанса.
„Факт е дека има богато академско искуство, има години и години партиски стаж во СДСМ, таму го познаваат. Мислам дека има конекции со разноразни групации кои постојат. Мислам дека има добра стартна основа“, рече Пендаровски.
Констатирана оставката на Заев, течат роковите за нова Влада
Според контактите кои се во тек, шефот на државата додаде дека предавањето на мандатот би требало да се случи наредната недела.
„Според контактите на двата кабинети, мислам дека тоа ќе се случува во текот на следната недела, не само затоа што роковите течат, туку мислам дека некои нивни партиски процедури се најавуваат за понеделник навечер, на кои тоа ќе биде дефинирано и можеби следната среда или вторник, ќе можеме да влеземе и во таква процедура – предавање на мандатот на мандатарот“, додаде Пендаровски.
Заев заминува - за едни како херој, за други како предавник
Собранието денеска ја констатираше оставката на премиерот Зоран Заев од функцијата. Toj оставката ја најави по одржувањето на локалните избори на кои претрпе изборен пораз од ВМРО-ДПМНЕ. Во писмото што со оставката што го прати до собранискиот спикер Талат Џафери наведе дека „одлуката ја донел како логичен чекор што произлегува од исходот на локалните избори и како израз на одговорност за изборите“.
Претходно си поднесе оставка и од лидерската позиција во СДСМ на чие чело беше од 2013 година. За негов заменик како партиски претседател на избори на кои гласаше членството на владејачката партија беше избран актуелниот заменик министер за финансии Димитар Ковачевски кој се очекува да биде и новиот мандатар. Заев пред заминувањето од позицијата договори влегување на Алтернатива во владата, со што владиното мнозинство, кое има мандат до 2024 година, би имало мнозинство од 64 пратеници. Заев беше премиер од мај 2017 година.