Иран со нови ограничувања за тоа како жените може да се облекуваат

Наредбата на иранскиот претседател Ебрахим Раиси за спроведување на законот за хиџаб и чистота во земјата резултираше со нова листа на ограничувања за тоа како жените можат да се облекуваат.

Мохамад Салех Хашеми Голпајегани на Националната конференција за хиџаб изјави дека според новата наредба, „прекршителите“ ќе бидат казнети, додека женските владини службеници ќе бидат отпуштени ако нивните профили на социјалните мрежи не се во согласност со исламските закони.

Голпајегани е секретар на иранскиот „Штаб за наредување право и забранување на злото“, кој е одговорен за одредување и спроведување на моделите на однесување во општеството.

Врз основа на новиот закон за хиџаб жените кои ги објавуваат своите слики без хиџаб на интернет ќе бидат лишени од некои социјални права од шест месеци до една година.

Веста доаѓа во време на неодамнешните извештаи дека властите во Иран сè повеќе се спротивставуваат на жените за кои се смета дека го прекршуваат носењето хиџаб, кое е задолжително на јавни места во Иран.

Иранската морална полиција ги предупредува производителите на облека да избегнуваат „светли“ бои

Во последниве недели, на жените за кои беше проценето дека не ги почитуваат законите, им беше забранет влез во владини канцеларии, банки или да се возат во јавен превоз.

Хиџабот стана задолжителен за иранските жени и девојчиња над 9-годишна возраст по Исламската револуција во 1979 година. Многу Иранки го прекршија правилото со текот на годините и ги поместуваа границите на она што официјалните лица велат дека е прифатлива облека.