Alimusriekteášši maŋiduvvo
Otne lei plánejuvvon njealját beaivi Unjárgga vuoigatvuođa-áššis Alimusrievttis, muhto ii šatta mihkkege buozalmasvuođa dihtii. Otne vuossárgga livččii leamaš daid badjeolbmuid sáhkavuorru, geat dorjot Finnmárkku opmodaga (FeFo) dán áššis. FeFo ovdanbuvttii iežaset ákkastallama mannan vahkus. Meahcceduopmostuolus oaččui Unjárgga gilisearvi hálddašanvuoigatvuođa birrasiid 400 km2 viidosaš guvlui Unjárgga gielddas. Finnmárkku opmodat (FeFo), guhte dál hálddaša guovllu, guoddalii ášši.