Rekordmange europeiske studentar til Noreg

Noreg er ein populær destinasjon for utveksling blant internasjonale studentar – særleg europeiske, skriv Direktoratet for høgare utdanning og kompetanse i ei pressemelding.

I 2025 kom 11.619 internasjonale studentar til Noreg. 85 prosent av desse var europeiske.

– Det er ein markant auke på ti år, då 77 prosent av dei kom frå europeiske land, seier avdelingsdirektør Magnus Fodstad Larsen.

Ein av fem er frå Tyskland. Frankrike er på andreplass og Italia tredje. Samstundes er det færre studentar frå USA.