په کندهار کې د خپلو ۴ همکارانو په وژنه تورن پولیس نیول شوی
د دوى په خبره، دغه پوليس سرتېري وړمه شپه د کندهار د ژړۍ ولسوالۍ د تانګۍ درې په يوه پوسته کې خپل څلور پوليس همکاران وژلي وو.
د کندهار د پوليسو ویاند څارن ضيا دراني ازادي راډيو ته وويل، د سيد نعيم په نوم دغه پوليس په ميوند ولسوالۍ کې د تېښتې پر مهال نيول شوی دى
دی وایي:
"مخکې له دې چې دى له ساحې ووځي، د پوليسو د تالاشۍ پر مهال پر عمومي سړک ونيول شو، دا اړخ به هم معلوم شي چې له وسله والو طالبانو سره يې اړيکې درلودې او که څنګه؟ خو د لومړنيو معلوماتو له مخې، داسې ښکاري چې دغه کس له وسله والو ترهګرو سره اړيکې نه درلودې."
ښاغلى درانى وايي، ښايي دغه پوليس به د رواني فشارونو له کبله خپل همکاران وژلي وي.
تر دې وړاندې هم په کندهار کې دې ورته څو پېښې شوي، خو دا اول وار دى چې د داسې يوه بريد عامل نيول کېږي.