د پاکستان د هاکي ملي لوبډلې لوبغاړو ګواښ!

د پاکستان د هاکي ملي لوبډلې لوبغاړو ګواښ کړی که ورته ډېلي الاونس يا ورځنی لګښت ورنه‌کړل شي، نو په اسیايي جام سیالیو کې به ګډون ونه‌کړي.


د اردو پوائنټ وېب‌پاڼې د معلوماتو له مخې، پاکستاني لوبغاړو دغه ګواښ د اسیا جام سیالیو لپاره د پاکستانۍ لوبډلې له اعلان څو دقیقې وروسته کړی.


دغو لوبغاړو ویلي چې له تېرو څو میاشتو راهیسې ورته د هاکي فدراسیون له‌خوا ډېلي الاونس نه‌دی ورکړل شوی چې له امله‌یې دوی له يو ډول ذهني فشار سره مخ دي.


د پاکستان د هاکي لوبډلې کپټان رضوان سنئیر ویلي چې هاکي فدراسیون د لوبغاړو د ډېلي الاونس له درکه ۸ لکه روپۍ باقي دی.


بل‌خوا د پاکستان د هاکي فدراسیون مشر خالد سجاد کهوکهر بیا لوبغاړو ته ډاډ ورکړی چې د اسیايي جام سیالیو په وړاندې به دوی ته خپل حقوق وسپاري.