د پاکستان د بشري حقونو وفاقي وزيرې د زده کوونکو بې درکه کول غېرقانوني کار بللی دی۔ شيرين مزاري پرون (مارچ اوومه) تر هغه وروسته له مشال راډيو سره خبرې وکړې چې کله په اسلام اباد کې د بلوڅ زده کوونکو پرلت ته ورغله او د هغوی غوښتنې ېې واورېدلې. بلوڅ زده کوونکو د مارچ له لومړۍ نېټې راهيسې د اسلام اباد پرېس کلب مخې ته پرلت وهلی او دوی د قايداعظم پوهنتون د زده کوونکي حفيظ بلوڅ او نورو لادرکه کسانو د موندلو غوښتنه کوي.
