د تاجکستان حکومت: طالبانو د برښنا پیسې نه دي ورکړي
د تاجکستان د برښنا شرکت مشر محمد عمر اسوزاده په دوشنبې کې یوې خبري ناستې ته وویل، چې د طالبانو حکومت افغانستان ته د وارېدونکې برښنا پیسې نه دي ورکړي.
نوموړي که څه هم ښکاره نه کړه، چې د طالبانو حکومت د دوی څومره پوروړی دی، خو تر دې مخکې تاجک چارواکو د جنوري میاشتې په ۳۱مه نېټه ویلي و چې په افغانستان کې واکمن حکومت د برښنا له درکه له دوی ۳۱ میلیونه ډالره پوروړی دی.
نوموړي زیاته کړه، چې تاجکستان په کلني ډول افغانستان ته ۹ میلیونه کيلو واټه برښنا ورکوي چې هر واټ یې ۳ سېنټه بیه لري.
د ازادي راډیو خبریالانو هڅه وکړه څو د طالبانو حکومت د برښنا شرکت ویاند حکمت الله میوندي په دې اړه وپوښتي، خو اړیکه ورسره ټینګه نه شوه او نه یې هم د دې خبر تر خپرېدو پیغام ته ځواب ورکړ.