له افغانستانه چین ته د جلغوزو، بادامو او مرخېړیو صادرات زیاتېږي
د طالبانو حکومت د صنعت او سوداګرۍ وزارت په خپل ټویټر پاڼه لیکلي، چې د سوداګرۍ سرپرست وزیر نورالدین عزیزي په کابل کې د چین له سفیر وانګ یو سره دا او دې ته ورته مسایلو باندې خبرې کړي.
وزارت وړاندې لیکلي، چې دواړو خواو د سوداګرۍ په پیاوړتیا، ټرانزیټ او همداراز د سوداګرۍ او پانګونې په برخه کې د نویو فرصتونو په رامنځته کېدو بحث کړی دی.
د طالبانو د سوداګرۍ او صنعت وزارت وړاندې لیکي، چې په دغه ناسته کې چین له افغانستان سره د صاداراتو په برخه کې د زیاتې همکارۍ ژمنه کړې.
دا ناسته داسې مهال ترسره کېږي، چې له دې وړاندې په کابل کې د چین سفیر د طالبانو حکومت د بهرنیو چارو سرپرست وزیر سره افغان سوداګرو ته د چین د ویزو د ورکړې په برخه کې د پرتو ستونزو د حل ژمنه کړی وه.