د افغانستان د صنعت کارانو ټولنه له طالبانو د برښنا ستونزې حل غواړي
د دغې ټولنې مشر عبدالجبار صافي نن ازادي راډيو ته وویل، که د فابریکه لرونکو ستونزې د برښنا په برخه کې حل شي دغه چاره کولای شي د صنعت د ودې او دغه شان افغانستان ته د بهرنیو پانګو په جذب کې مرسته وکړي.
د صافي په خبره، په افغانستان کې د برښنا په برخه کې پیل شوې پروژې باید تر منزله ورسېږي څو له فعالیته لویدلې فابریکې بېرته فعاله شي.
د افغانستان د صنعت کارانو ټولنه داسې مهال دغه څرګندونې کوي، چې له دې وړاندې په افغانستان کې د فابریکو پر وړاندې د برښنا کمښت یوه جدي ستونزه بلل شوې او وخت ناوخت یې د حل کېدو په اړه اندېښنې مطرح شوې وې.
هڅه مو وکړه، په دې اړه د افغانستان له برښنا شرکت سره خبرې وکړو خو په اړیکه ورسره بریالي نه شوو.