نصير احمد فايق: د 'واخان' د برخهليک په اړه بايد وضاحت ورکړل شي
ښاغلي فایق تېره شپه په ټویټر کې ولیکل چې د واخان د برخهلیک په اړه باید وضاحت ورکړل شي.
دی وایي، که چېرته په دې اړه کومه پټه موافقه شوې وي او پاکستان په خپل سر د افغانستان له خاورې د خپلو اقتصادي ګټو لپاره استفاده وکړي یا هم پر پوله د عمدي بدلون نخښې ولیدل شي دا موضوع به د ملګرو ملتونو امنیت شورا ته د یوې مستندې تخطي په ډول وړاندې کړي.
په وروستیو کې په خواله رسنیو کې داسې ویډیوګانې خپرې شوې دي چې د بدخشان په واخان ولسوالۍ کې د پاکستان له لورې پر پوله تېری کېږي.
د طالبانو دفاع وزارت دا اوازې رد کړې دي او ویلي یې دي چې دا حقیقت نه لري او اسلام اباد تر دې دمه په دې اړه څه نه دې ویلي.