د المپيک کمېټه: که طالبان نجونو ته د ورزش اجازه ورنهکړي د دې کمېټې لوبو کې ګډون نهشي کولی
طالبانو په افغانستان کې پر ښځو د محدودیتونو د لګولو په ترڅ کې د ښځو پر سپورت هم بندیز لګولی.
د المپیک د نړیوالې کمیټې اجراییه بورډ د سویس په لوزان ښار کې پخپله پرونۍ غونډه کې په افغانستان کې د ښځو پر سپورتي لوبو د طالبانو د محدودیتونو په اړه د یوه بشپړ راپور له اورېدو وروسته له دې کبله سخته اندېښنه وښوده او په کلکه یې وغندل، خو دې کمېټې طالبانو ته کوم ضرب الاجل ونه ټاکه.
د المپیک نړیوالې کمېټې له غونډې وروسته په یوه بیان کې له طالبانو وغوښتل چې د پاریس په المپیک کې د افغانستان د ټیمونو په ترکیب کې نجونو ته هم ونډه ورکړي.
د بشري حقونو د څار سازمان یا هیومن رایټس واچ پرون د المپیک له نړیوالې کمېټې غوښتنه وکړه چې پر ښځو د طالبانو د بندیزونو په خاطر دې افغانستان ته په نړیوالو سپورتي لوبو کې د ګډون اجازه نه ورکوي.