په کندهار کې مخکېني خبریال 'نصیر میرزايي' ځان وژنه کړې
د طالبانو د کندهار د امنیه قومندانۍ مطبوعاتي دفتر رسنیو ته په یوه استولي پیغام کې ویلي چې دغه خبریال نن په خپل کور کې ځان وژنه کړې ده.
طالبانو د نوموړي خبریال د ځان وژنې علت کورنۍ ستونزې یادې کړي دي.
تراوسه د دې خبریال کورنۍ د دې پېښې په اړه څه نه دي ویلي.
د طالبانو د دویم ځلي په واکمنۍ سره د خبریالانو پر وړاندې تاوتریخوالی زیات شوی او د رسنیو ملاتړ بنسټونو په وینا چې لسګونه رسنۍ تړل شوي، خبریالان بې کاره شوي او ان ځینو خبریالانو بهرنیو هېوادونو ته پر لاره ژوند له لاسه ورکړی دی.