سرچینه: په میدان وردګ کې د یوې مدرسې ۲۱ زده کوونکي مسموم شوي

د میدان وردګ ولایت په عامې روغتیا ریاست کې یوې سرچینې خبر ورکړ چې تېره شپه د دغه ولایت د سیداباد ولسوالۍ په لوړې سیمې کې د یوې دیني مدرسې ۲۱ تنه زده کوونکي مسموم شوي دي.


د دغه ولایت د روغتیا ریاست یوې سرچینې د نوم نه ښودلو په شرط ازادي راډیو ته وویل د مسمومیت لامل بخارۍ وه چې په دغې مدرسه کې ایښودل شوې وه.


د سرچینې په وینا ۱۰ تنه شدید مسموم شوي کسان یې د درملنې په موخه غزني ښار ته رسولي او نورو کسانو درملنه یې د پېښې په سیمه کې کړې ده.


ازادي راډیو هڅه وکړه چې د دغه ولایت د عامې روغتیا ریاست او د افغانستان د عامې روغتیا وزارت د چارواکو نظر هم واخلي، خو هغوی په دې اړه د خبرو څخه ډډه وکړه.


ځايي سیمه ییز رسنیو د میدان وردګو ولایت د عامې روغتیا ریاست د چارواکو له قوله ورته خبر ورکړی دی.