ټېسټ کرکټ؛ اسټرالیا په لومړۍ سیالۍ کې انګلستان ته ماتې ورکړه
د دې لوبې پچه انګلستان ګټلې وه او توپوهنه یې غوره کړه، کوربه لوبډلې په لومړۍ پاڼۍ کې د ۸ لوبغاړو په سوځېدو سره ۳۹۳ منډې وکړې او تر یوې حیرانونکې پرېکړې وروسته یې کپتان خپله پاڼۍ ونه غځوله او اسټرالیا ته یې د توپوهنې بلنه ورکړه.
په لومړۍ پاڼۍ کې انګلنډ ته جو روټ سلیزه ووهله او په ۱۱۸ منډو ناسوځېدلی پاتې شو.
د اسټرالیا په توپ اچونکو کې نتن لاین ۴ لوبغاړي وسوځول.
مېلمه لوبډلې د خپلې لومړۍ پاڼۍ پیل ډېر ښه وکړ، خو د لوبې په درېیمه ورځ یې ټول لوبغاړي په ۳۸۶ منډو وسوځېدل.
د دوی مخکښ توپوهونکی عثمان خواجه و چې ۱۴۱ منډې یې کړې وې.
سټورټ براوډ او اولي روبینسن درې درې وېکټې سوځولې وې.
د انګلستان د توپوهنې دویمې پاڼۍ ډېر دوام ونه کړ او د جو روټ او هري بروک د ۴۶ـ۴۶ منډو پر مټ یې ۲۷۳ منډې وکړې او اسټرالیا ته یې د ۲۸۱ منډو هدف وټاکه.
په اسټرالیايي توپ اچونکو کې بیا هم نتن لاین ۴ لوبغاړي وسوځول او دا ځل ورسره پاټ کمینس هم ۴ وېکټې ترلاسه کړې.
اسټرالیا د هدف ترلاسه کولو لپاره یو وار بیا د عثمان خواجه په نیمه سلیزې او د لوبډلمشر پاټ کمینس په چټکو ۴۴ ناسوځېدلو منډو ځان ورساوه او د ۸ لوبغاړو تر سوځېدو وروسته یې لوبه وګټله.
عثمان خواجه چې په لومړي ځل یې په ایشیز سیالیو کې سلیزه وهلې وه، د دې لوبې د غوره لوبغاړي جایزه وګټله.
د ویلو ده چې دواړه لوبډلې به د دې لوبلړۍ دویمه لوبه د جون په ۲۸مه نېټه د کرکټ په کور لارډز لوبغالي کې پيل کړي.