په کابل کې د یوناما دفتر سره نېږدې په ډزو ۱ تن وژل شوی دی

په کابل کې د ملګرو ملتونو د مرستندویه ماموریت (یوناما) په دفتر کې یو تن په ډزو وژل شوی او یو بل ټپي دی.

رویټرز خبري اژانس راپور ورکړی چې پېښه نن (د فیبرورۍ پر دریمه)غرمه مهال شوې ده.


د یوناما مطبوعاتي دفتر تایید کړې چې پېښه د کابل ختیځ، پلچرخي ته نږدې د ملګرو ملتونو په یوه دفتر کې شوې ده.


د یوناما په وینا، د طالبانو یو غړی د ملګرو ملتونو د احاطې دباندې مړ موندل شوی، خو دا نه دي ویل شوي چې هغه څنګه مړ شوی. یوناما ویلي چې د دوی ساتونکو پر طالبانو ډزې نه دي کړي.


د پېښې علت او انګیزه لا روښانه نه ده. د طالبانو د کورنیو چارو وزارت ویاند، عبدالمتین قانع، هم دا پېښه تایید کړې. هغه ویلي چې د ملګرو ملتونو په دفتر کې د ډزو له امله د طالبانو یو سرتېری وژل شوی او د یوناما یو کارکوونکی برسېرن ټپي شوی دی.


قانع ویلي چې د دې پېښې په اړه پلټنې روانې دي. دا پېښه د ملګرو ملتونو د یو اېن او سي اې مرکز کې شوې، چېرته چې د یوناما دفتر، د ملګرو ملتونو نورې څانګې، اړوند بنسټونه او پروګرامونه موقعیت لري. همدارنګه، په دې مرکز کې د ملګرو ملتونو نړیوال کارکوونکي هم اوسېږي.


ملګرو ملتونو ویلي چې دوی او د طالبانو حکومت د پېښې د پلټنې لپاره کار کوي. تر دې پېښې وروسته، د یوناما په وینا، طالبانو د ملګرو ملتونو د یاد مرکز دننه او بهر ټول فعالیتونه د لنډ وخت لپاره بند کړي وو، خو اوس بېرته پیل شوي دي.


یوناما په افغانستان کې خپل فعالیت د ۲۰۰۲ز کال په مارچ کې پیل کړی دی.


دې ماموریت موخه په افغانستان کې د سولې، ثبات، او پرمختګ لپاره د ملګرو ملتونو د هڅو همغږي کول او د خلکو ملاتړ کول دي.


یوناما ماموریت هر کال د ملګرو ملتونو امنیت شورا له‌خوا تمدیدیږي.


په افغانستان کې د طالبانو تر واکمنیدو وروسته هم یوناما په افغانستان کې خپل فعالیت دوامداره ساتلی دی.