بلوچستان کې سرکاري ملازمینو د تنخاګانو زیاتولو لپاره احتجاجونه کړي دي
د بلوچستان په بېلا بېلو ضلعو کې د جنورۍ پر ۱۳مه سرکاري ملازمینو د تنخاګانو زیاتولو لپاره احتجاجونه کړي دي.د بلوچستان ګرینډ الاینس په نوم د سرکاري ملازمینو اتحادیې مشرانو په قلات، دالبندین، تربت، پسني او پښین ضلعو کې د احتجاج په توګه د شاوخوا دوو ساعتونو لپاره لويې لارې تړلې وې او له حکومته یې غوښتنه کوله چې د وفاقي ملازمینو په څیر دې ورته په تنخاګانو کې د توپير کمولو تخصيص يا ډيسپېريټي ريډکشن الاونس (ډي ار اې) ورکړل شي.
سرکاري ملازمينو تر دې وړاندې، د جنورۍ پر ۱۲مه د هغې صوبې په خضدار، کلا سيف الله، پنجګور، ډېره مراد جمالي، نوشکي او اوتل ضلعو کې احتجاجونه کړي ول او د دوو ساعتونو لپاره يې لويې لارې د ټرافيکو پر مخ تړلې وې.
ملازمينو دا ډول د جنورۍ پر ۱۴مه د بلوچستان په ډېره الله یار، حب، خاران، ږوب، ګوادر، چمن او رکڼۍ سيمو کې هم احتجاجونه اعلان کړي او د دوو ساعتونو لپاره يې د لويو لارو د تړلو هوډ کړی دی.
د پښين د سرکاري ملازمينو د اتحادیې مشر محمد رسول وفا کاکړ د جنورۍ پر ۱۳مه د احتجاج پر مهال مشال راډيو ته وویل چې وفاقي حکومت د ۲۰۲۴ز او ۲۰۲۵ز په کلنۍ مالي بوديجه کې ملازمینو ته د ډي ار اې ورکولو اعلان کړی وو، چې د هغه په وينا، وفاقي ملازمینو ته ورکړل شوی خو د بلوچستان حکومت تر اوسه دوی ته دغه اضافي پيسې نه دي ورکړي.
نوموړي زياته کړه چې د دوی د اتحاديې مشرانو څو ځلې د بلوچستان له حکومت سره خبرې کړي خو تر اوسه دوی ته دغه مراعت نه دی ورکړل شوی. د هغه په خبره، صوبايي حکومت د دوی غوښتنو ته جدي نه دی نو ځکه دوی په احتجاجونو لاس پورې کړی دی.
اخوا د بلوچستان د خزانې وزیر شعیب نوشیرواني څو ورځې وړاندې ویلي وو چې سرکاري ملازمینو ته په تنخاګانو کې د دغو ځانګړو پيسو په ورکولو سره پر هغې صوبې د ۲۰ اربه روپيو اضافي بوج راځي، نو د دې ستونزې د هوارولو لپاره يې له حکومتي چارواکو سره سلا مشورې پیل کړې دي.