پنجاب او بلوچستان کې ټرافیکي پېښو کې ۲۴ کسان وژل شوي
چارواکي وايي د پاکستان په بلوچستان او پنجاب صوبو کې په دوو ټرافیکی پېښو کې لږ تر لږه ۲۴ کسان وژل شوي او له ۴۰ زیات ژوبل دي.د پنجاب د سرګودې ضلعې د ژغورنې ادارې (رېسکیو ۱۱۲۲) رسنیو ته په استولي بیان کې ویلي دي چې د جنورۍ پر ۱۷مه یوه لارۍ وچ کانال (نهر) ته ولوېدله چې پکې ۱۴ کسان ووژل شول چې شپږ پکې ماشومان دي.
ډان ورځپاڼې د پنجاب د ژغورنې ادارې له خولې لیکلي دي چې په لارۍ کې سپاره کسان له اسلام اباده فیصل اباد ته په یوه جنازه کې د ګډون کولو لپاره روان ول چې موټر یې د حادثې ښکار شو.
د ژغورنې اداره وايي د لړې له وجې د اسلام اباد او لاهور ترمینځ های وې (لویه لاره) تړل شوې ده او ګاډي په جي ټي روډ تګ راتګ ته اړ شوي دي.
بل پلو، د بلوچستان د ګوادر په اورماړه تحصیل کې د مکران پر ساحلي های وې (لویې لارې) یو مساپر وړونکی بس د تېز رفتارۍ له وجې اوړېدلی دی چې ورکې لږ تر لږه ۱۰ کسان وژل شوي او له ۳۵ زیات ژوبل دي.
د اورماړو پولیسو مشر بشیر یوسف د جنورۍ پر ۱۷مه مشال راډیو ته وویل چې بس له کراچۍ د بلوچستان جیواني ته روان وو او ورکې سپاره کسان د سېند صوبې مزدوران وو چې د کار لپاره جیواني ته تلل.
په پاکستان کې وخت په وخت ټرافیکي پېښې زياتره وخت د ټرافیکي قوانینو د نه عملي کېدو، د سړکونو د خرابوالي، د ډرېورانو د بې احتیاطۍ او د هغوی د سمې روزنې نه کېدو او پر ټاکلي وخت د ګاډو د مرمت او معاینې نه کولو له وجې کېږي.
د دې ترڅنګ په ځینو وړو ښارونو او کلیوالو سیمو کې د ټرافیک کنټرول نظام کمزوری دی چې د حادثو مخه نیول ګرانوي. داراز، په ګاډو کې له اندازې زیات بار لېږدول یې هم کله نا کله توازن خرابوي او د پېښو ښکار کېږي.
د همدې له کبله د پاکستان په مختلفو برخو کې ټرافیکي پېښې وخت په وخت خلکو ته ځاني او مالي تاوانونه اړوي.