Sulmuesi vret 4 persona, përfshirë një polic, në Nju Jork

Katër persona, përfshirë një polic, u vranë pasi një sulmues hyri në një ndërtesë në Manhatan të Nju Jorkut dhe hapi zjarr, thanë zyrtarët.

Një tjetër person raportohet se është në gjendje kritike shëndetësore, ndërkaq sulmuesi duket se ka bërë vetëvrasje, tha kryetari i Nju Jorkut, Eric Adams.

Sulmuesi u filmua në kamerat e sigurisë duke dalë nga një veturë me një pushkë të llojit M-4. Ai më pas hyri në ndërtesë, hapi zjarr ndaj zyrtarit policor dhe më pas vazhdoi të shtinte në ndërtesë, tha komisarja policore Jessica Tisch, gjatë një konference për media të hënën.

Sulmuesi, pasi shtiu në lobin e ndërtesës, shkoi me ashensor në katin e 33-të ku vazhdoi të shtënat dhe më pas, sipas autoriteteve, e vrau veten.

Policia më vonë e gjeti trupin e tij dhe pranë trupit u gjet edhe arma.

Në ndërtesën ku ndodhën të shtënat janë të vendosura kompani të ndryshme.

Komisarja Tisch tha se i dyshuari besohet se ka vepruar i vetëm, por hetimet po vazhdojnë, për të cilat Byroja Federale e Hetimit (FBI) po ofron mbështetjen.

Policia amerikane e ka identifikuar sulmuesin si Shane Tamura nga Las Vegas dhe komisarja Tisch tha se janë gjetur një pistoletë e municion në veturën e tij, si dhe ilaçe.

Ky person kishte histori të problemeve të shëndetit mendor, sipas zyrtarëve policorë në Las Vegas, por ai kishte një leje të vlefshme për posedim të armëve të lëshuar në Nevada, tha Tisch.

Ditëve të fundit, ai kishte udhëtuar me veturë përmes disa shteteve nga jugperëndimi i SHBA-së dhe kishte arritur në Nju Jork të hënën, shtoi ajo.

Incidenti nisi rreth orës 18:00 (rreth mesnatës, sipas kohës lokale në Kosovë), kur u raportuan të shtëna dhe qindra policë u nisën drejt ndërtesës që gjendet në një zonë të frekuentuar nga turistët.

Kryetari i Nju Jorkut tha se polici i vrarë ishte një 36-vjeçar, imigrant nga Bangladeshi. Ndërkaq, viktimat e tjera janë dy burra dhe dy gra.

Policia ende nuk ka dhënë ndonjë motiv të mundshëm për të shtënat.

Të shtëna masive ndodhin shpesh në SHBA, ku e drejta e posedimit të armëve është e drejtë kushtetuese.

Vetëm gjatë këtij viti, 254 të shtëna masive kanë ndodhur në SHBA, përfshirë edhe incidentin e së hënës në Nju Jork, sipas Arkivit të Dhunës me Armë Zjarri – i cili i përcakton të shtënat masive si ngjarje kur katër apo më shumë persona sulmohen me armë zjarri.