Irani ekzekuton një person të dënuar për spiunazh për Izraelin
Autoritetet iraniane kanë ekzekutuar një burrë, i cili ishte dënuar për spiunim për Izraelin. Sipas gjyqësorit iranian, personi që u ekzekutua i kishte dërguar informacione Izraelit lidhur me shkencëtarët bërthamorë të cilët u vranë gjatë luftës 12-ditore që Teherani zhvilloi me Izraelin në qershor.
“Roozbeh Vadi... u ekzekutua pas proceseve gjyqësore dhe konfirmimit të dënimit të tij nga Gjykata e Lartë”, u tha në ueb-faqen e gjyqësorit, Mizan Online, ku u shtua se ai kishte zbuluar informacion për një “shkencëtar bërthamor që u vra gjatë agresionit të fundit të regjimit sionist”.
Ekzekutimi u krye me varje, u tha në njoftim.
Nuk është e qartë se kur ky person u arrestua apo kur u dënua.
Mizan tha se Vadi transferoi “informacion të klasifikuar”, pasi ishte rekrutuar online nga agjencia izraelite e spiunazhit, Mossad.
Në mes të muajit qershor, Izraeli nisi një fushatë bombardimesh të paprecedentë ndaj Iranit, duke nxitur një luftë gjatë së cilës Irani iu përgjigj me sulme me raketa dhe dronë.
Ofensiva izraelite vrau komandantë të lartë ushtarakë, shkencëtarë bërthamorë dhe qindra të tjerë, duke goditur si vende ushtarake ashtu edhe zona rezidenciale në Iran.
Sipas mediave lokale, dhjetëra shkencëtarësh bërthamorë u vranë gjatë ofensivës izraelite.
Që kur u zhvillua kjo luftë, Irani ka premtuar gjyqe të shpejta për personat e arrestuar nën dyshimin për bashkëpunim me Izraelin.
Autoritetet kanë njoftuar arrestime të shumta të personave të dyshuar për spiunazh për Izraelin dhe ekzekutimin e disa të dënuarve për bashkëpunim me Mossadin.
Sipas grupeve të të drejtave të njeriut, përfshirë organizatën Amnesty International, Irani është vendi i dytë në botë sa i përket numrit më të lartë të ekzekutimeve, pas Kinës.