Türkmenistan bedenterbiýe we sport boýunça bäş ýyllyk programmasyny kabul etdi
Döwlet metbugaty bu kararyň, ýurtda sporty goldamak, şeýle-de "güýç we bagtyýarlyk döwründe" ilatyň saglygyny berkitmek, erbet endiklere garşy göreşmek hem-de ýaş nesli sporta söýgi ruhunda terbiýelemek üçin kabul edilipdir.
Türkmenistanda bedenterbiýäni we sporty ösdürmegiň inisiatory bolup prezident Gurbanguly Berdimuhamedow çykyş edýär. Şeýle-de sagdyn durmuşyň wagyzçysy Berdimuhamedow wagtal-wagtal dürli sport görnüşlerindäki maşklary bilen köpçüligiň öňüne çykýar. Ýylyň dowamynda yzly-yzyna geçirilýän köpçülikleýin çärelere okuwçylar we býujet işgärleri gatnaşmaga mejbur edilýär. Döwlet edaralary sport enjamlaryny we geýimlerini satyn almak üçin ilatdan pul toplaýar.
Koronawirus pandemiýasy döwründe geçen ýylda prezidentiň gatnaşmagynda müňlerçe adamlyk sport çäreleri, welosipedli ýörişi geçirildi. Türkmen ýolbaşçylary ýurtda koronawirusyň ýokdugyny aýdýarlar.