Автомобилларда кундузи чироқ ёқиб юриш талаби бекор қилинди
Ўзбекистонда барча автомототранспорт воситалари учун яқинни ёритувчи чироқларини ёки кундузги сигнал чироқларини ёқиб ҳаракатланиш талаби бекор қилинди. Мазкур талаб Вазирлар Маҳкамасининг 17 декабрдаги 796-сонли қарори асосида “кенг жамоатчиликнинг фикрини инобатга олган ҳолда” бекор қилингани айтилмоқда.
“Ўзбекистон Республикаси Ҳукуматининг айрим қарорларига ўзгартиришлар киритиш, шунингдек, баъзиларини ўз кучини йўқотган деб ҳисоблаш тўғрисида”ги мазкур қарорга мувофиқ, бундан буён автомобилларнинг чироқ ёқиб юришига оид талаб фақат қуйидаги 6 та ҳолат бўйича мажбурий этиб белгиланган:
транспорт воситалари ташкилий жамланма сафида ҳаракатланаётганда;
йўловчиларни ташиётган автобус ва йўналишли транспорт воситаларида;
болалар гуруҳини ташкилий ташишда;
хавфли, катта ўлчамли ва оғир вазнли юкларни ташишда;
механик транспорт воситаларини шатакка олишда;
мотоцикл ва мопедларда.
Ички ишлар вазирлиги Йўл ҳаракати хавфсизлиги бош бошқармаси ахборот хизматининг қайдича, ушбу талаблар йўлларда ҳаракат хавфсизлигини таъминлашга, шунингдек, йўл ҳаракати иштирокчиларининг ҳаёти ва соғлиғини асрашга хизмат қилади.
Ўзбекистонда куннинг ёруғ вақтида барча автоуловлар яқинни ёритувчи чироқларини ёки кундузги сигнал чироқларини ёқиб ҳаракатланиши шартлигига оид ҳукумат қарори ўтган йилнинг 9 апрели имзоланган бўлиб, 2021 йил 1 январидан кучга кириши керак эди.
Бу борада жамоатчилик орасида норозилик кучайиб кетгани ортидан жорий йил майида Қонунчилик палатасининг қатор депутатлари бу қарорни бекор қилиш таклифи билан чиқишганди.