Швейцариядаги курортда карантинда бўлган 400 нафардан ортиқ британиялик турист ғойиб бўлди
Швейцариядаги Вербе тоғ-чанғи курортига келган ва ўн кун карантинда ўтириши керак бўлган буюк британиялик 400 нафардан ортиқ турист ғойиб бўлди, деб ёзмоқда Daily Telegraph.
Буюк Британия ҳукумати мамлакатда коронавируснинг ўта юқумли штамми аниқлагани тўғрисида маълум қилганидан сўнг Швейцария ҳукумати 20 декабрда Буюк Британия билан авиақатновларни тўхтатганди. Мамлакатга 14 декабргача келган британиялик туристларга ўн кун карантинда ўтириш кераклиги белгиланганди.
27 декабр куни Вербедаги меҳмонхоналар эгалари британиялик туристлар ҳаттоки нонушта ҳам қилмасдан меҳмонхоналарни тарк этгани ва алоқага ҳам чиқмай қўйгани тўғрисида хабар беришди. Маълум бўлишича, курортда карантинга олинган 420 нафар британияликдан бор-йўғи 20 нафарга яқини қолган.
Вербе курорти жойлашган Вале кантони ҳукумати бошлиғи Кристоф Дарбелле чегаралар «тешик» эканлигини, одамлар ҳеч қандай ҳужжат кўрсатмасдан бутун Европа бўйлаб саёҳат қилишлари мумкинлигини айтди. Унинг сўзларига кўра, айрим британияликлар Вербени машинада тарк этган ва аллақачон ўз юртларига етиб боришган.
Баъзи туристлар эса чанғида Францияга ўтиб кетган бўлиши мумкинлиги айтилмоқда.
Швейцарияда мажбурий карантин қоидаларини бузганлик учун 10 минг франккача жарима белгиланган.
interfax.ru