Миллиардер Ричард Брэнсон илк бор коинот сарҳадига кўтарилди
Миллиардер Ричард Брэнсон жамоаси билан бирга учган Unity ракетоплани суборбитал парвоздан сўнг эсон-омон ерга қўнди.
Virgin Galactic хусусий ширкатига тегишли учиш аппаратининг 71 ёшли конструктор, ҳавода сузувчи ва эндиликда астронавт ҳам бўлмиш Ричард Брэнсон раҳбарлигидаги парвози АҚШнинг “Америка” космопортида якунланди.
Тарихда биринчи марта космик аппарат яратувчиси унда синов парвозини амалга оширди. Аппаратни атмосферанинг юқори қатламларига олиб чиқиш, ташувчи учоқдан узилиш, ракета юритгичини ишга тушириш ва 80 километрдан зиёд баландликка мустақил кўтарилиш, сўнгра қўнишни режалаштириш ва қўниш бир соат давом этган.
Ракетоплан бортида Брэнсон билан бирга астронавтлар Сириша Бандла, Килин Бэннет ва Бетт Мозеслар бўлган.
“Интерфакс” хабарига кўра, Unity белгиланган баландликка кўтарилгач, йўловчилар Ерни томоша қилишлари учун бир неча дақиқа муаллақ турган, шундан сўнг пастлай бошлаган. Трансляция чоғида шовқин пайдо бўлганига қарамай, Брэнсон томошабинларга мурожаат қилишга ва уларни ушбу воқеа билан табриклашга улгурган.
Коинотга саёҳат парвозларини ривожлантириш йўлида галдаги воқеа 20 июль куни содир бўлиши кутилмоқда: ўша куни Amazon асосчиси Жефф Безос ўз укаси ҳамда кимошди савдосида 28 миллион долларга чипта сотиб олган яна бир йўловчи билан бирга Blue Origin ширкатининг New Shepard ҳаво кемасида парвоз қилади.
Брэнсон учиши олдидан Blue Origin ширкати ўз ракетоплани суборбитал баландликда қолишини таъкидлаган эди, ҳолбуки New Shepard кемаси, режага кўра, юз километр баландликда Ер атмосфераси билан космос ўртасидаги шартли чегарани босиб ўтиши керак.