Хитой-ўзбек вакцинасининг клиник синовлари хулосаси эълон қилинди
Коронавирусга қарши ZF-UZ-VAC2001 вакцинасининг 3-фаза клиник синовлари вакцина барча штаммлар учун умумий 81,76 фоиз самарадорлигини кўрсатди, деб билдирди Ўзбекистон Инновацион ривожланиш вазирлиги 28 август куни.
Вазирликка кўра, клиник синовлари натижалари “Хитойлик ҳамкорлар томонидан 27-28 август кунлари Хитой фонд бозорида ҳамда Рейтер ахборот агентлиги сайтида эълон қилинди”.
“3-дозадан сўнг вакцинанинг самарадорлиги барча штаммлар учун умумий 81,76%, «британча» штаммга қарши эса 92,93% ташкил этди. Ўлим ва оғир холатларга қарши 100% самарадорлигини кўрсатди. ЖССТ талабларига кўра вакцина камида 50%дан юқори самара бериши лозим”,-дейилади расмий маълумотда.
Дунё бўйлаб ZF-UZ-VAC2001 клиник тадқиқотларида жами 28 500 нафар кўнгилли иштирок этган. Синов Хитойнинг Хунан вилоятида, шунингдек, Ўзбекистон, Индонезия, Покистон ва Эквадорда ўтказилди.
Клиник тадқиқотларда Ўзбекистондан жами 6966 нафар кўнгилли иштирок этди, улардан 214 нафари 60 ёшдан катта кишилардир.
“Тадқиқотлар давомида ҳар бир кўнгилли иштирокчи 28 кун оралиғи билан 3 та дозада «вакцина/плацебо» схемасида эмланди. Улардан 13 кишида ўрта даражадаги ножўя таъсир аниқланган бўлиб, 0,002 фоиздан кам кўрсаткичдир. Алоҳида ажратилган гуруҳларда 95% ҳолатларда етарли даражада антитаналар ишлаб чиқарилгани аниқланди”,-дейилади билдирувда.