Афғонистонда автомобиль туннелида юз берган ҳалокат оқибатида қурбон бўлганлар сони ошиб бормоқда
Парван вилоятидаги Саланг довонидан ўтувчи автомобиль туннелида юз берган ҳалокат оқибатида қурбон бўлганлар сони 31 кишига етди, деб хабар тарқатди Tolo News телеканали мамлакат соғлиқни сақлаш вазирлиги вакили Шарофат Замон берган маълумотга таяниб.
Бир кун аввал 19 кишининг ҳалок бўлгани ҳақида маълум қилинган эди.
«Қурбон бўлган 31 кишининг жасади ҳамда 37 нафар жароҳатланганлар ёнғин рўй берган жойдан кўчирилган», – дейилади хабарда. Унинг қўшимча қилишича, қурбонлар сони кўп бўлиши ҳам мумкин.
Автоцистерна Бағландан Кобулга кетаётган бўлган ва Саланг туннели ичида ёниб кетган. Бензин ташувчи автомобилда ёнғин келиб чиққандан кейин аланга кўмир ортилган иккита юк автомобилига ўтган, натижада 12 автомобилнинг ёниб кетишига сабаб бўлган.
Саланг туннели Ҳиндиқуш тоғидаги денгиз сатҳидан 3,2 минг метр баландликда жойлашган. Туннелнинг узунлиги 3,6 километр, кенглиги 6 метр келади. Мазкур туннель Кобул билан мамлакатнинг шимолий вилоятларини боғлаб турувчи ягона автомобиль йўли ҳисобланади.