Парижда 69 ёшли шахс одамларни ўққа тутгани оқибатида 3 киши ҳалок бўлди

Франция пойтахти Парижда 23 декабрь куни одамлар ўққа тутилиши натижасида уч киши ҳалок бўлди, яна бир неча киши яраланди. Энгиен кўчасидаги курд миллий маркази ва шарқий вокзал яқинида содир бўлган нохуш ҳодиса ҳақида BFM TV телеканали хабар қилди.

Одамларни ўққа тутган 69 ёшли қўлга олинган, у касалхонага етказилган, унинг бу жиноятга ундаган сабаблар аниқланмоқда.

Воқеа гувоҳлари журналистларга у тўппончадан камида беш марта ўқ узишга улгургани ва кўчада талотум бошлагани ҳақида сўзлаб берганлар.

Ҳуқуқ-тартиботчилар ўқотар қуролни ишга солган шахс бир йил муқаддам 12-округдаги муҳожирлар лагерига совуқ қурол билан ҳужум қилганлиги учун қўлга олингани, унга нисбатан ирқчилик важидан зўравонлик айблови бўйича жиноят иши очилганини аниқлаганлар.

Франция ички ишлар вазири Жеральд Дарманен одамлар ўққа тутилгани ортидан мамлакат бўйлаб сафарини тўхтатиб, Парижга қайтаётганини эълон қилган. Париж мэри Анн Идальго тезкор ҳаракат учун полицияга миннатдорлик билдириб, ҳалок бўлган ва тан жароҳати олганларнинг оилаларига ҳамдардлик изҳор этган.