Грузияда Саакашвилини озод қилиш ҳаракати фаоллашди

Грузия собиқ президенти Михаил Саакашвилининг тарафдорлари, Саакашвили тузган “Ягона миллий ҳаракат” партияси фаоллари, мухолиф кайфиятдаги жамоатчилик вакиллари ва маданият арбоблари 26 декабрь куни президент Саломе Зурабишвили қароргоҳи ёнида муддатсиз пикет бошлашди.

Акция ташкилотчиси, университет профессори Георгий Мумладзе журналистларга пикетчилар президент маъмуриятига Саакашвилини зудлик билан афв этиш илтимоси билан петиция топширишди, дея хабар қилди Озодликнинг Тбилисидаги мухбири.

Аввалроқ орасида Грузия ва хорижда таниқли шахслар бўлган 500 дан зиёд аёл шу каби илтимос билан Зурабишвилига очиқ хат йўллаган эди. Аввалроқ Грузия президенти собиқ президентни афв этмаслигини билдирган.

Бу орада россиялик мухолифатчи Михаил Ходорковский ҳам Саакашвили ҳимоясига чиққан. “Мен Саакашвилининг фанати эмасман, бироқ ҳозир у сиёсий маҳбус ва мен унинг тарафидаман”, деб ёзган Ходорковский Твиттердаги ўз саҳифасида.

Ўтган ҳафта Саакашвили россиялик жамоат арбоби Марк Фейгинга хат ёзган. Унда собиқ президент ўзининг қамоқхонада Россия президенти буйруғига кўра заҳарлашганини иддао қилган. Бу воқеа ортидан Адлия вазирлигининг Жазони ижро этиш департаменти Саакашвилига хат чиқаришни тақиқлаб қўйган.

Саакашвили ваколатларини суиистеъмол қилганлик айблови билан олти йиллик қамоқ жазосини ўтамоқда. Грузияда унга қарши яна бир нечта иш қўзғатилган. Улар орасида чегарадан ноқонуний ўтганлик айблови ҳам бор. Ўтган йили чегарадан яширинча ўтиб келган Саакашвили Тбилисида қўлга олиниб, қамоқхонага йўлланган эди. Май ойида соғлиғи ёмонлашган собиқ президент клиникага кўчирилганди.