Хитой носозлик ортидан роботаксиларга лицензия беришни тўхтатди
Хитой ҳукумати Баиду компаниясига тегишли учувчисиз транспорт воситалари ишидаги носозликдан сўнг роботаксилар учун янги лицензиялар беришни тўхтатди. Бу ҳақда Ixbt.com хабар беради.
Ўтган ойда Ухан шаҳрида ўнлаб Аполло Го роботаксилари тўсатдан тўхтаб қолган. Оқибатда йўловчилар қийин аҳволда қолган ва транспорт ҳаракати бузилган.
Ушбу ҳодиса расмийларни хавотирга солди. Саноат ва ахборот технологиялари вазирлиги ҳамда бошқа идоралар вакиллари иштирокида махсус йиғилиш ўтказилди.
Регуляторлар маҳаллий ҳокимият органларини хавфсизлик назоратини кучайтиришга ва шунга ўхшаш ҳодисаларнинг олдини олишга чақирди.
Янги лицензиялар беришнинг тўхтатилиши компанияларга ўз автопаркини кенгайтириш ва янги шаҳарларда лойиҳаларни ишга тушириш имконини бермайди. Чеклов қанча давом этиши ҳозирча номаълум.