Вĕри апат çитереççĕ
Раççей Президенчĕн йышăнăвĕпе килĕшӳллĕн, çĕршывра 2020-мĕш çулти авăн уйăхĕнчен пуçласа кĕçĕн класра вĕренекенсене тӳлевсĕр вĕри апат çитереççĕ. Чăваш Енре ку çăмăллăхпа 1-4-мĕш классенче вĕренекен 64 000 ытла ача усă курать. Пуçламăш класра пĕлӳ пухакансене апатлантарма пĕлтĕр хыснара 607 миллион тенкĕ ытла пăхса хăварнă. Кăçал ку сумма тата пысăкрах – федераци хыснинчен çеç 638 миллион тенкĕ майлă килмелле. Çак ыйтупа калаçрĕç те ертӳлĕхĕн тунтикунсерен иртекен ларăвĕнче. Паян Чăваш Енре пур шкулта та, вĕсем вара 410, пуçламăш класра вĕренекенсене вĕри апатпа тивĕçтереççĕ. 146 шкула техĕмлĕ çимĕçе апат-çимĕç комбиначĕ çитерет. Ытти 264 шкулта вара вырăнта хăйсем пĕçереççĕ. Чăваш Республикин Пуçлăхĕн Хушăвĕпе килĕшӳллĕн ку вĕренӳ çулĕнче нумай ачаллă тата сахал тупăшлă çемьесенчи 5-11-мĕш классенче вĕренекенсем те тӳлевсĕр апатланма пултараççĕ. Çак тĕллевпе республика хыснинче 75 миллион тенкĕ пăхса хăварнă. Чăваш Республикин Пуçлăхĕ Олег Николаев шкул ачисене апатлантармалли çимĕçе централизациллĕ туянмалли пирки çул-йĕр картине хатĕрлеме ыйтрĕ. Çапла туни ултавлă тавар туянассинчен хăтармалла, тивĕçтерекен çимĕç пахалăхĕ пысăк пулмалла. Республика ертӳçи хăш-пĕр район пуçлăхĕсен ĕçĕсемпе кăмăлсăр пулнине те палăртрĕ. Сахал тупăшлă, нумай ачаллă çемьесенчи вĕренекенсене справка пулсан тӳлевсĕр çитереççĕ. Ăна вара муниципалитетсем Чăваш Енри ĕçлев тата социаллă хӳтлĕх министерстви урлă электронлă мелпе те ыйтса илме пултараççĕ. Анчах темшĕн вырăнти пуçлăхсем ашшĕ-амăшĕ хут çинчи справкăна килсе парасса кĕтсе лараççĕ. Пăрачкав, Елчĕк, Тăвай, Улатăр, Патăрьел районĕсенче вара çак электронлă мелпе хыпара илесси пирки килĕшӳ те туман иккен. «Сахал тупăшлă е нумай ачаллă çемьесенчи вĕренекенсене те апатпа тивĕçтермелли пирки калаçма пуçласан ку çăмăллăхпа 12 000 ытла ача усă курма пултарасси пирки каланăччĕ, анчах та иртнĕ çул виçĕ пин ытларахăшĕ çеç апатланнă. Çакă чи малтанах шкул директорĕсем, вĕрентӳ управленийĕн ĕçченĕсем, район администрацийĕн пуçлăхĕсем ĕçлесе çитерейменнине кăтартать», – çапла хытах каласа Олег Алексеевич ку çивĕч ыйтупа çывăх вăхăтра каллех тĕл пулассине палăртрĕ. Алина Сусметова, Татьяна Молокова, Бахтияр Велиев