Фирдүс Тямаев: «Әллә кем булган, дип уйлый күрмәгез, тик...»

Фирдүс Тямаев быелгы концертларыннан соң тамашачы янына фотога төшәргә чыга алмавының сәбәпләрен аңлаткан.

Дуслар, мин быел фотога төшәргә чыга алмыйм. Ачуланмагыз берүк. Әллә кем булган, дип уйлый күрмәгез, тик аякка «нагрузка» күп, ахырдан аяк үзен сиздерә. Шул сәбәпле чыга алмыйм. Азрак тернәкләнеп беткәч, сезнең белән кочакланышып фотоларга төшәрбез әле, – дигән ул сторисларны.

Фирдүс «Интертат»ка аягы белән проблемалар башлану балачакта алган җәрәхәт белән бәйле булуын сөйләгән иде. «Балачакта аякны каты гына бәргән идем. Мотоциклдан егылганым булды. Бервакыт ат дулап китеп, арбасы аякны таптап киткән иде. Ул вакытта табибларга күренү дигән нәрсә юк. Әти-әнидән качып, бераз аксаклап йөрисең дә, аннары җайлана инде ул. Шуларның кайсыннандыр яра калган, кайсыннан икәнен төгәл белмим дә. Шушы сөяк чатнап калган. Аның белән мин үскәнмен. Ул сөяк бераздан ныклыгын югалткан, һәм анда киста үскән», – диде ул.

Тямаев моннан 2 ел элек Германиядә операция ясаткан иде. Ул уңышсыз чыкты. Җырчыга әле узган ел ахырында гына тагын бер катлаулы операция кичерергә туры килде.

• Фирдүс Тямаев операциядән соң: «Ярты елдан аяксыз калачаксың дигәннәр иде»

• Фирдүс Тямаев тагын операциягә керә: «Бәлки, бу – эстрададан китәргә бер билгедер миңа»