Դաշքեսանում առևանգված ընդդիմադիրը մեղադրվում է «թմրանյութերի համար»
Ադրբեջանում երեկ ձերբակալել են ընդդիմադիր «Ժողովրդական ճակատ» կուսակցության Դաշքեսանի շրջանի գրասենյակի ղեկավար Սահիբ Մամեդզադեին։ Կուսակցությունից նշում են, որ դիմակավորված մարդիկ առևանգել են Մամեդզադեին և տարել անհայտ ուղղությամբ, երբ նա իր անասուների հետ արոտավայրում էր։ Ավելի ուշ պարզվել էր, որ ընդդիմադիր գործչին տեղափոխել են Բաքու և մեղադրում են «ապօրինի թմրանյութեր պահելու համար»:
«Ժողովրդական ճակատը» կասկածներ չունի, որ կուսակցության հերթական անդամի ձերբակալությունը պայմանավորված է իր քաղաքական գործունեությամբ։ Կուսակցության առնվազն հինգ անդամներ են այս պահին գտնվում ադրբեջանական բանտերում տարբեր մեղադրանքներով։
Տեղացի իրավապաշտպանների տվյալներով՝ Ադրբեջանում քաղբանտարկյալների թիվը հասել է 288-ի, ինչն ամենաբարձր ցուցանիշն է երկրի՝ Եվրոպայի խորհրդին միանալուց ի վեր:
Ըստ «Հանուն Ադրբեջանի քաղբանտարկյալների ազատության» դաշինքի մարտի 18-ին հրապարակված ցուցակի՝ վերջին 3 ամսում քաղբանտարկյալների շարքերը համալրել է ևս 43 մարդ։
Ցուցակում կա 22 լրագրող և բլոգեր, 2 իրավապաշտպան, ընդդիմադիր կուսակցությունների և շարժումների անդամներ՝ 22 հոգի, Գերմանիայից արտաքսված քաղէմիգրանտներ՝ 5, 208 հավատացյալներ, Թարթառի գործով դատապարտվածներ՝ 7 հոգի, Գյանջայի գործով դատապարտվածներ՝ 13 հոգի, ցմահ դատապարտյալներ՝ 11 հոգի։
Լրագրողների դեմ հետապնդումների մասին՝
Ադրբեջանում դեռ գտնում են՝ ում լռեցնել
Ադրբեջանում բոլորը գոհ են կամ «լրտես»
Հավատացյալների դեմ հետապնդումների մասին՝
Ես չեմ ուզում լինել Ադրբեջանի քաղաքացի
The post Դաշքեսանում առևանգված ընդդիմադիրը մեղադրվում է «թմրանյութերի համար» first appeared on Epress.am.