Россия Хөкүмәте коронавирусны дәвалау өчен гидроксихлорохин кулланырга рөхсәт итте

(Казан, 17 апрель, «Татар-информ»). Россия Хөкүмәте Covid-19 коронавирус инфекциясен дәвалау өчен Кытайда җитештерелгән гидроксихлорохин препаратын кулланырга йөкләмә бирде. Шул хактагы боерыкны РФ Премьер-министры Михаил Мишустин имзалаган. Документ хокукый мәгълүмат интернет-порталында дөнья күргән.

Әлеге препаратны Россия Сәламәтлек саклау министрлыгының Илкүләм кардиология медицина тикшеренү үзәге бүләчәк һәм бушлай тапшырачак.

Сүз Кытай Халык Республикасыннан бушлай кайтартылган, «Шанхай Фармасьютикалс Холдинг Ко., Лтд.» компаниясе тарафыннан җитештерелгән 68,6 мең кап препарат хакында бара.

«Сәламәтлек саклау өлкәсендә күзәтчелек федераль хезмәтенә, «Дару препаратлары белән эш итү турында»гы законда билгеләнгән тәртиптә, әлеге дару препаратының нәтиҗәлелегенә һәм куркынычсызлыгына мониторинг үткәрергә», - диелә документта.