Zgjedhjet në SHBA: Republikanët me fitore të ngushtë në Dhomën e Përfaqësuesve

Republikanët kanë siguruar 218 vendet e nevojshme për një shumicë në dhomën e ulët të Kongresit një javë pas zgjedhjeve të mesmandatit, sipas projektimeve të mediumeve amerikane.

Përderisa diferenca e partisë në Dhomën e Përfaqësuesve është e pakët, mjafton që të pengojë agjendën e Presidentit Joe Biden, për dy vitet e ardhshme.

Kevin McCarthy, udhëheqësi i republikanëve në Dhomën e Përfaqësuesve, festoi rezultatin.

Por demokratët do të ruajnë kontrollin e dhomës së sipërme, Senatit.

Kongresi i ri do të mblidhet në janar

Republikanët - të cilët kishin shpresuar të rifitonin kontrollin e të dy dhomave - performuan nën pritshmëritë në zgjedhjet e mesmandatit të javës së kaluar.

Por ata fituan vendin që u nevojitej për shumicën e tyre në Dhomën e Përfaqësuesve të mërkurën, kur distrikti i 27-të i Kalifornisë shkoi te Mike Garcia.

Partia Republikane tani parashikohet të fitojë 218-223 vende në Dhomën e Përfaqësuesve prej 435 vendesh, sipas CBS.

Por me votat në disa gara të ngushta ku ende po numërohen votat, shumica e tyre mund të mos jenë të qarta për ditë apo edhe javë.

McCarthy, i cili u zgjodh nga republikanët të martën si kandidati i tyre për të zëvendësuar demokraten Nancy Pelosi si kryetaren e ardhshme të Dhomës së Përfaqësuesve, tha se dhoma ishte "ndryshuar zyrtarisht".

"Amerikanët janë gati për një drejtim të ri dhe republikanët e Dhomës së Përfaqësuesve janë gati të japin rezultat," shkroi kongresmeni nga Kalifornia të mërkurën mbrëma.

Për t'u zgjedhur Kryetar, udhëheqësi i pakicës republikane në Dhomën e Përfaqësuesve duhet të fitojë mbështetjen e shumicës nga 435 anëtarët e Dhomës së plotë.

Gruaja e parë që mbajti këtë post, zonja Pelosi, 82, nuk tha asgjë në deklaratën e saj për shtyp nëse planifikonte të qëndronte si udhëheqëse e pakicës, mes spekulimeve në Uashington për të ardhmen e saj.