Myslimanët bëhen gati për Ramazan

Miliona myslimanë në mbarë botën po bëhen gati për të nisur agjërimin në Muajin e Ramazanit që nis më 11 mars, varësisht nga vëzhgimet pamore të Hënës së re. Palestinezët në Rripin e Gazës këtë vit këtë muaj të shenjtë të islamit e presin mes luftës që po vazhdon midis Izraelit dhe Hamasit – grupit palestinez të shpallur organizatë terroriste nga SHBA-ja dhe BE-ja. Në vende të tjera të botës, myslimanët janë furnizuar me hurma dhe gjësende të tjera ushqimore, por edhe me fenerë, që për shumë vende myslimane është një dekor që vendoset në rrugë dhe shtëpi gjatë Ramazanit, muajit kur besimtarët agjërojnë nga agimi deri në perëndim të diellit si shenjë sakrifice dhe përkushtimi ndaj Zotit.