АЙГА КЫРЫН КАРАМА
7 февраль (шимбә). Рабигүл ахир аеның 17 нче көне. 19 нчы Ай тәүлеге. Ай Үлчәү йолдызлыгында, 20.35 сәгатьтә калка, 8.15 сәгатьтә бата. 3 нче фаза. Көн озынлыгы 9.04 сәгать.
Авыр энергетикалы көн. Күп кеше арасында йөрүдән, күз тиюдән саклану зарур. Бурычка бирергә дә, алырга да ярамый. Ашкайнату һәм кан әйләнеше системасы, талак, арка зәгыйфь.
Иммунитетка ярдәм кирәк
Хәзер организмның саклагыч көчләре тәэсирен арттыру мөһим. Шунлыктан 1,5 стакан йөзем яки күрәгә, 1 стакан әстерхан чикләвеге, ярты стакан бадәм чикләвеге, 2 лимонның кабыгын иттарткычтан чыгарып, өстенә лимон согын сыгалар, 1 стакан бал кушалар да, яхшылап болгатып, 1-2 көн караңгы урында тоталар (аннары суыткычта саклыйлар), көненә 3 тапкыр, ашарга 1 сәгать кала, 1-2шәр аш кашыгы кабалар.
8 февраль (якшәмбе). Рабигүл ахир аеның 18 нче көне. 20 нче Ай тәүлеге. Ай Үлчәү йолдызлыгында, 21.41 сәгатьтә калка, 8.34 сәгатьтә бата. 3 нче фаза. Көн озынлыгы 9.07 сәгать.
Саф һавада йөрү, физик эш белән шөгыльләнү тынычландыра. Салкын тиюдән саклану сорала. Ашказаны, нерв системасы, бөерләр, күзләр, бавыр зәгыйфь. Канны чистарту уңай нәтиҗә бирә.
Күзләрне саклау мөһим
Күзләрне саклауда иң әһәмиятлесе – витаминнарга бай ризыклар ашау. А витамины кишер, помидор, салат, яшел борчак, яшел суган, эремчек, бавырда күп. В витамины – яшелчә, гөмбә, сөт-катыкта, С витамины – гөлҗимеш, бәрәңге, тозлы кәбестә, цитрус җимешләрендә шактый. Елына 2 тапкыр кишер согын дару урынына эчәргә кирәк – ай буена һәр иртәне яртышар стакан. Петрушка согы да күзне ныгыта. Чөгендер согы эчү күзләрне сафландыра, канны һәм бөтен организмны чистарта. 2 аш кашыгы чөгендер согын кишер-петрушка согына кушып эчү дә файдалы.
9 февраль (дүшәмбе). Рабигүл ахир аеның 19 нчы көне. 20 нче Ай тәүлегенең дәвамы. Ай Үлчәү йолдызлыгында, 22.48 сәгатьтә калка, 8.54 сәгатьтә бата. 3 нче фаза. Көн озынлыгы 9.11 сәгать.
Үткән көнгә бирелгән киңәшләр саклана. Ай Үлчәүдә чакта бөерләргә һәм ашказанына игътибарлырак булу сорала. Күп сыеклык эчмәскә кирәк. Бөердән ташларны куа, буыннарны һәм умырткалыкны чистарта торган төнәтмә ясап эчү файда бирә: 1 литрлы банкага 2шәр аш кашыгы каен яфрагы һәм гөлҗимеш җиләге салып, өстенә кайнар су агызалар, җылы итеп төреп төнәтәләр, кич 2 стакан эчәләр.
10 февраль (сишәмбе). Рабигүл ахир аеның 20 нче көне. 21 нче Ай тәүлеге. Ай Чаян йолдызлыгында, 23.50 сәгатьтә калка, 9.16 сәгатьтә бата. 3 нче фаза. Көн озынлыгы 9.16 сәгать.
Хәлиткеч карарлар кабул ителә торган актив көн. Яңа эш урынына күчү, сәяхәткә чыгу, теләсә нинди эш башлау өчен кулай вакыт. Саф һавада күбрәк булырга, физик эш белән шөгыльләнергә кирәк. Күп ашамау хәерле. Бүген бавыр, бөер, бизләр системасы зәгыйфь. Мүк җиләге, балан, миләш ашау файдалы.
Аяк табаннары ни “сөйли”
Аяк табаннарында бөтен система һәм әгъзалар белән бәйләнгән 70 мең нерв күзәнәге урнашкан, шунлыктан алар сәламәтлек турында бик төгәл “сөйләп” бирә ала. Әгәр тиктомалдан дүрт бармак астында (баш бармак түгел) сөялләр чыга икән, бу нерв системасы какшауны күрсәтә. Уң аякның чәнчә бармак асты мөгез матдә белән капланса – бавыр, сул аякныкы капланса – йөрәк-кан тамырлары авырулары барлыгына ишарә. Урта бармак астындагы сөялдән котылмыйча, конъюнктивиттан да котылып булмаячак. Аяк табанының эчке ягындагы сөял - эчәклектә, тышкы ягындагысы умырткалыкта булган чирләрне күрсәтә. Үкчә кырыендагы тире тупаслану кан тамырларына игътибар итәргә кирәклекне искәртә.
11 февраль (чәршәмбе). Рабигүл ахир аеның 21 нче көне. 22 нче Ай тәүлеге. Ай Чаян йолдызлыгында, 23.54 сәгатьтә калка, 9.41 сәгатьтә бата. 3 нче фаза. Көн озынлыгы 9.20 сәгать.
Акыл җыю көне, энергетикасы яңа белем алу өчен уңай. Көтелмәгән идеяләр туа. Туйганчы ашарга-эчәргә, кешеләр белән аралашырга кирәк. Организм йогышлы авыруларга тиз бирешүчән. Операцияләр ясату тыела. Нерв системасы, умырткалык, әвернә сөяк зәгыйфь. Ач тору файдалы.
Панкреатит интектерсә
2 кишер һәм 3 бәрәңгене яхшылап юып, сокларын сыгып алалар, 1 стакан чамасы сок чыга. Аны атна буе ашарга 30 минут кала эчәләр. Аннары 7 көн ял итәләр дә, тагын 1 атна эчәләр. Дәва курсы – 3 атна. Тозлы кәбестә согы да бик файдалы, тик аны әзерләгәндә кишер дә, тәмләткечләр дә салмаска кирәк. 50 г гөлҗимеш тамырын 250 мл суда ярты сәгать пешерәләр, көненә 3 тапкыр 2-3әр йотым эчеп куялар. Яисә термоска 1 уч гөлҗимеш җиләге салып, өстенә 1 литр кайнар су агызалар, 1 сәгать төнәтәләр, ашар алдыннан яртышар стакан эчәләр. Көненә 1 тапкыр ашар алдыннан якынча 3 граммлы прополис кисәген бик яхшылап чәйнәп йоту да файдалы.
12 февраль (пәнҗешәмбе). Рабигүл ахир аеның 22 нче көне. 23 нче Ай тәүлеге. Ай Укчы йолдызлыгында, 1.02 сәгатьтә калка, 10.12 сәгатьтә бата. 4 нче фаза. Көн озынлыгы 9.25 сәгать.
Ымсыну, кызыгу, җимерү куәте көчле. Авантюраларга бирелергә ярамый. Бүген кешеләр бер-берсен үпкәләтә һәм шуннан үзләренә рәхәтлек ала. Физик хезмәт белән шөгыльләнү, дару үләннәре белән дәвалану уңай нәтиҗә бирә.
13 февраль (җомга). Рабигүл ахир аеның 23 нче көне. 24 нче Ай тәүлеге. Ай Укчы йолдызлыгында, 2.08 сәгатьтә калка, 10.49 сәгатьтә бата. 4 нче фаза. Көн озынлыгы 9.29 сәгать.
Гаиләдә тулы килешү, мәхәббәт хөкем сөрә. Хәлсез кешеләргә күбрәк ял итәргә кирәк. Сизү әгъзалары, кан тамырлары, бавыр, тире зәгыйфь. Артык активлык хупланмый. Эчке тавышка колак салырга була.
Дөге кабартмасы
Ярты стакан дөге, 3 аш кашыгы он, ярты литр сөт, 3 йомырка, 1 лимон, 2-3 аш кашыгы шикәр, аз гына атланмай, шикәр оны, тоз, кыздырыр өчен үсемлек мае кирәк. Дөгене сөттә пешерәләр. Пешеп чыкканда, атланмай, шикәр, тоз һәм аз гына лимон цедрасы өстиләр. Суынгач, 3 йомырка сарысы һәм он кушып, яхшылап болгаталар, 10-15 минуттан соң туглап күпертелгән йомырка акларын кушып, акрын гына болгаталар да, аш кашыгы белән алып, кечкенә шарларны кайнап торган майда тиз генә кыздыралар. Табынга шикәр оны сибеп кайнар килеш бирәләр.