АЙГА КЫРЫН КАРАМА
30 май (шимбә). Шәгъбән аеның 12нче көне. 13нче Ай тәүлеге. Ай Чаян йолдызлыгында, 16.17 сәгатьтә калка, 1.58 сәгатьтә бата. 2нче фаза. Көн озынлыгы 17.03 сәгать.
Үзгәрешләр көне. Үткәннәр турында уйланып, нәтиҗәләр ясау яхшы. Ач торырга ярамый – теләсә нәрсә ашарга була. Аралашу, белем алу өчен уңай вакыт. Йөрәк, тире, кан тамырлары зәгыйфь. Чикләвек ашау файдалы.
Укроп сихәте
Цистит интектергәндә, 1 чәй кашыгы укроп орлыгын каһвәтарткычта тарттыралар да, 1 стакан кайнар суга салып, 1 сәгать төнәтәләр. Икегә бүлеп, ач карынга иртә һәм кич эчәләр. Дәва курсы – 1 атна.
31 май (якшәмбе). Шәгъбән аеның 13нче көне. 14нче Ай тәүлеге. Ай Чаян йолдызлыгында, 17.25 сәгатьтә калка, 2.22 сәгатьтә бата. 2нче фаза. Көн озынлыгы 17.06 сәгать.
Иң әһәмиятле эш-гамәлләргә тотыну өчен уңайлы көн. Бүген башланган эш бик яхшы тәмамланачак. Теләсә нинди вак-төяккә игътибарлы булу сорала. Эчәклек һәм тирене чистарту уңай нәтиҗә бирә. Ашказаны асты бизе зәгыйфь. Балан, фасоль, борчак, арпа ашау файдалы.
Күз кайгыртканны ярата
Күз күремен яхшырту өчен, 4 чәй кашыгы бака үләне яфрагын 2 стакан кайнар суга салып, сүрән утта 20 минут пешерәләр, суытып, сөзәләр, көненә 3 тапкыр, ашарга 15 минут кала, яртышар стакан эчәләр. Петрушка тамырын уып, шулкадәр үк лимон цедрасы кушалар, тәменчә бал өстиләр һәм ашарга 1 сәгать кала 1әр чәй кашыгы кабалар, дәва курсы – 1-2 ай. Диңгез балыгын ешрак ашау да файдалы, үзендәге омега-3 май кислоталары хисабына ул күзләрдәге кан әйләнешен яхшырта. 1 чәй кашыгы күкчәчәк (василек) чәчәген 1 стакан кайнар суда 30 минут төнәтәләр дә, сөзеп, көненә 2-3 тапкыр шул төнәтмәдә чылатылган мамык тампоннарны күзгә куеп ятып торалар.
1 июнь (дүшәмбе). Шәгъбән аеның 14нче көне. 15нче Ай тәүлеге. Ай Укчы йолдызлыгында, 18.33 сәгатьтә калка, 2.51 сәгатьтә бата. 2нче фаза. Көн озынлыгы 17.09 сәгать.
Авыр энергетикалы көн. Бүген кеше үз нәфесенең теләк һәм коткыларына бигрәк тә бирешүчән.Тыелгысыз хисләр күңелсез вакыйгаларга китерергә мөмкин. Тәэсирләнүчән кешеләргә бигрәк тә кыен. Алма, кәбестә, сарымсак ашарга ярамый, балан, мүк җиләге, кычыткан ашау файдалы.
2 июнь (сишәмбе). Шәгъбән аеның 15нче көне. 16нчы Ай тәүлеге. Ай Укчы йолдызлыгында, 19.37 сәгатьтә калка, 3.24 сәгатьтә бата. 21 сәгать 22 минуттан тулы Ай. Көн озынлыгы 17.11 сәгать.
Тыныч, иҗади, уңышлы көн. Һәрнәрсәдә гармониягә омтылу, җан тынычлыгын саклау мөһим. Дулкынландыргыч очрашулар булырга мөмкин. Килешүләр төзү уңай нәтиҗә бирә. Кан авырулары кискенләшә. Беркемгә дә үпкә сакларга ярамый. Ай тулган чакта кешенең эчке куәте активлаша, тыелгысыз хисләрне бераз йөгәнләү зарур.
3 июнь (чәршәмбе). Шәгъбән аеның 16нчы көне. 17нче Ай тәүлеге. Ай Укчы йолдызлыгында, 20.37 сәгатьтә калка, 4.07 сәгатьтә бата. 3нче фаза. Көн озынлыгы 17.13 сәгать.
Мәхәббәт, иҗат, яшәү шатлыгы көне. Бернәрсә дә планлаштырмыйча, теләгән нәрсәләрне генә эшләү яхшы. Нерв һәм эндокрин системаларга, күзләргә игътибарлырак булу сорала. Үпкәләшкән кешеләр белән дуслашыр вакыт. Яшелчәләрне күбрәк ашау файдалы.
Ютәлдән дәва
1 литр суга 1әр алма, суган, бәрәңге салып, кайнатып чыгаралар да, сүрән утта 30 минут пешерәләр, бераз суынгач, сөзәләр, әз генә бал кушып, көненә 3 тапкыр яртышар стакан эчәләр. Яисә уылган кишерне сөткә салып, йомшарганчы пешерәләр дә, җылы килеш ашыйлар, бал яки атланмай кушарга да була. 3-4 инҗир җимешен 1 стакан кайнаган сөткә салып, ярты сәгать төнәтәләр, сөтен дә эчәләр, җимешләрен дә ашыйлар. Җылы зәйтүн маена шулкадәр үк бал кушып, көненә 3-4 тапкыр 1әр чәй кашыгы эчү дә ютәлне баса.
4 июнь (пәнҗешәмбе). Шәгъбән аеның 17нче көне. 17нче Ай тәүлегенең дәвамы. Ай Кәҗәмөгез йолдызлыгында, 21.29 сәгатьтә калка, 4.59 сәгатьтә бата. 3нче фаза. Көн озынлыгы 17.15 сәгать.
Үткән көнгә бирелгән киңәшләр саклана. Ай Кәҗәмөгездә чакта хисчәнлек кими, җаваплылык хисе, җитдилек арта. Тез, буыннар зәгыйфь. Ремонт ясау, йорт төзи башлау өчен уңай вакыт.
Чөгендер шифа бирә
Чөгендердә магний күп, ә бу микроэлемент кан басымын төшерү үзлегенә ия. Шунлыктан ярты стакан чөгендер согына шулкадәр үк бал кушалар да, көненә 4 тапкыр чирегешәр стакан эчәләр. Әлеге тамыразыкта йод һәм тимер дә күп, шуңа ул азканлылык булганда бик файдалы. Чөгендер, торма һәм кишер согын тигез микъдарда кушып, берничә ай дәвамында ашар алдыннан 1-2шәр аш кашыгы эчү бигрәк тә яхшы нәтиҗә бирә. Чи чөгендер согын кан куерганда, косметологлар исә тире картаймасын өчен эчәргә киңәш итәләр. Организмны шлаклардан чистартып, чөгендер ябыктыра һәм кәефне дә күтәрә.
5 июнь (җомга). Шәгъбән аеның 18нче көне. 18нче Ай тәүлеге. Ай Кәҗәмөгез йолдызлыгында, 22.13 сәгатьтә калка, 6.01 сәгатьтә бата. 3нче фаза. Көн озынлыгы 17.18 сәгать.
Алдашу, ялганга бай көн. Бизләр системасы, бил, бөерләр, тире, сукыр эчәк зәгыйфь. Мунчага бару, массаж ясату, ач тору, төрле дәвалану чараларын куллану файдалы.
Төрекчә ясмык ашы
1 стакан кызыл ясмык, 1 баш суган, 2-3 бүлем сарымсак, 2 бәрәңге, 1-2 аш кашыгы томат пастасы, 1 чәй кашыгы тоз, 30 грамм үсемлек мае, берәр чеметем кара һәм кызыл борыч, лимон кирәк. Суганны уып, сарымсакны издереп, майда кыздыралар, томат пастасы өстәп, болгата-болгата 1-2 минут җылыталар. 2-2,5 литр суны кайнатып чыгарып, томатлы суганны, ясмыкны салалар, 15 минуттан соң, уылган бәрәңге, тоз һәм борыч өстәп, тагын 10 минут пешерәләр. Аннары блендерда ваклатып алырга да була, шулай ашарга да ярый. Табынга лимон телеме һәм туралган яшел тәмләткечләр салып бирәләр.