Որքանո՞վ են հավաստի Հայաստանում ամենաշատ որոնվող կայքերի մասին Ahrefs-ի աղմուկ հանած տվյալները, ի՞նչ պատկեր են ցույց տալիս մյուս հաշվիչ կայքերը
Արդեն 2 օր է հայկական օնլայն տիրույթում լայն շրջանառվում է տեղեկատվություն այն մասին, որ ըստ Ahrefs ինֆորմացիոն բազայի Հայաստանում ամենաայցելվող կայքերը խաղային ոլորտում ժամանցի ծառայություն մատուցող կայքերն են։
Tert.am-ը ոլորտի մասնագետների հետ փորձել է պարզել, թե իրականում որքանո՞վ է այս տեղեկատվությունը համապատասխանում իրականությանը ու ինչպե՞ս են գոյանում այս տվյալները։
Մասնագետները նշում են, որ Ahrefs-ը եւ, օրինակ, Semrush-ը, որի տվյալները այլ պատկեր են տալիս (կից ներկայացված է վիճակագրությունը), տարբեր ինֆորմացիոն բազաներից են օգտվում վեբկայքերի այցելությունները հաշվարկելու համար եւ դրանք 100% ճշմարիտ չեն։
Այս տվյալների գոյացումը մեծ մասամբ կապված է բանալի բառերի հետ, այսինքն բանալի բառերի որոնման ծավալներով մոտավոր հաշվարկվում են համապատասխան տվյալները։
Աղբյուրների մի մասը պնդում է, որ Semrush-ի տվյալներն են առավել արժանահավատ, մյուս մասը՝ Ahrefs-ինը։ Մեդիափորձագետ Սամվել Մարտիրոսյանի կարծիքով այսօր ոչ մի հաշվիչ հարթակ ամբողջությամբ ճշգրիտ տվյալ չի փոխանցում եւ ներկայացվածները հարաբերական տվյալներ են։
Բացի այդ, պետք է հաշվի առնել, որ գովազդային նպատակով բավականին շատ են միակողմանի վերլուծությունները։ Այս դեպքում առավել կարեւոր է վեբկայքերը համեմատել միմյանց հետ կոնկրետ գործիքի շրջանակներում եւ հաշվի առնել այդ գործիքների միջեւ մրցակցությունը։
«Պատճառն այն է, որ իրենք ամեն դեպքում տեսնում են տվյալները երկրորդական աղբյուրներից եւ ոչ անմիջապես կայքից։ Որքան շատ են այցելությունները, այնքան գուցե տվյալները մոտ են իրականությանը, բայց, այնուամենայիվ, դրանք տարբերվում են ներքին տվյալներից՝ համեմատելով, օրինակ, Google Analytics-ի հետ։ Բայց Google Analytics-ը եւս կարող է սխալվել, որովհետեւ այնտեղ էլ կան տատանումներ։ Միշտ չէ, որ կոդը նորմալ է աշխատում, բացի դրանից կարող են առաջանալ դժվարություններ հաշվարկների հետ։ Ամեն դեպքում մեկ անգամ էլ նշեմ՝ սրանք շատ հարաբերական տվյալներ են։ Բացի դա, Ahrefs-ի մոտ ամբողջ թրաֆիքը չէ, միայն որոնողականն է։ Այսինքն, իրենք հաշվում են միայն որոնողական մեխանիզմներից եկած այցելությունները, չեն հաշվում ոչ սոցցանցերից եկածները եւ ոչ էլ անմիջական մուտք գործածները», – ասաց մեդիափորձագետը։
Մեր այն հարցին, թե կարելի՞ է արդյոք համեմատել Ahrefs-ի եւ Semrush-ի թրաֆիքները եւ այդ գործիքներով ուսումնասիրել շուկան, Մարտիրոսյանը նշեց.
«Semrush-ը փորձում է հաշվարկել ընդհանուր այցելությունները, Ahrefs-ի տվյալները արտահայտում են որոնողական այցելությունները, դա ամեն դեպքում իրենց կողմից ենթադրվող թրաֆիքն է։
Հասկանալի է, որ List.am-ը, գեմբլինգ կայքերը ու պոռնոգրաֆիկ կայքերը միանշանակ թոփ կայքեր են, բայց իրականությունը կարող է բավականին տատանվող լինել, եւ Semrush-ի ու Ahrefs-ի տվյալները չի կարելի ընդունել որպես վերին ատյանի ճշմարտություն»։
Semrush-ի տվյալներով ոչ մի գեմբլինգ կայք չի գտվում ամենաշատ այցելվող կայքերի ցանկում։ Այստեղ պետք է հաշվի առնել այն հանգամանքը, որ տվյալների վրա որոշակի ազդեցություն կարող է ունենալ նաեւ SEO գործիքների կիրառումը։
Մարտիրոսյանի կարծիքով դա տեսականորեն հնարավոր է։
«Ամեն դեպքում, եթե կայքը օգտագործում է Ahrefs-ի վճարովի տարբերակը եւ ունենում որոշակի տվյալներ, այո, դա կարող է ազդեցություն ունենալ, բայց որքանով՝ դժվարանում եմ ասել», – ընդգծեց Սամվել Մարտիրոսյանը։
Ամենաշատ այցելություն ստացող կայքերը ըստ Ahrefs-ի, հետեւյալն են.
Թվային մարքեթինգի մեկ այլ գործիքով ՝ Similarweb-ով, նկատում ենք տվյալների այլ պատկեր։ Այստեղ հաճախումների կտրուկ տարբերվող թվեր ենք տեսնում։
Սամվել Մարտիրոսյանի խոսքով, Similarweb-ը բոլորովին ուրիշ տեխնոլոգիայով է հաշվարկ իրականացնում։
«Բացի այլ տեխնոլոգիայի կիրառումից իրենք խորամանկություն են անում եւ
խրախուսում են, որպեսզի կայքերի սեփականատերերը կցեն Google Analytics-ի տվյալները։ Ու քանի որ մինչեւ վերջերս Similarweb-ը բավականին ծավալով անվճար տվյալ էր տալիս, շատ կայքեր կցում էին Google Analytics-ի տվյալները։ Պետք է նշել, որ նույնիսկ այս դեպքում Google Analytics-ի ու Similarweb-ի տվյալները ընդհուպ մինչեւ երկու անգամ տարբերություն էին տալիս։ Այնպես որ նորից գալիս ենք նրան, որ այս գործիքները կատարյալ չեն ու պետք է հասկանալ, որ սա շատ մոտավոր պատկեր է։ Բայց նորություն չէ, որ գեմբլինգը ՀՀ-ում պոպուլյարություն ունի», – ասաց Սամվել Մարտիրոսյանը։
Այսպիսով՝ նշված կայքերի հրապարակած տվյալները խիստ հարաբերական են եւ չեն արտահայտում իրականությունն ամբողջությամբ։ Մենք տեսնում ենք, որ մի դեպքում Հայաստանում թոփ երեք կայքերը խաղային կայքերն են, մեկ այլ դեպքում՝ youtube-ն ու facebook-ը։ Երկրորդային են նաեւ այս կայքերի սկզբնաղբյուրները, որոնց ճշգրիտ տեղեկատվություն փոխանցելու հավանականությունը մեծ չէ։