Зәйдә әфганчыларга юбилей медальләре тапшыру дәвам итә
Зәйдә хәрби комиссариат, кайнар нокталарда хәрби хезмәт үткәннәрнең җирле иҗтимагый оешмасы вәкилләре Әфганстан җирләреннән совет гаскәрләрен чыгаруга 25 тулу уңаеннан әзерләнгән юбилей медальләрен тапшыруны дәвам итә. Шундый тантаналы мизгел җомга көнне Аксар авылында Мөхәммәтҗановлар гаиләсендә узды. Анда әфганчы Ринат Мөхәммәтҗановка интернациональ бурычын намуслы үтәгәне өчен юбилей медале тапшырылды. Ринат әфәнде - Әфган җирендә саулыгын югалтып, ул физик мөмкинлеге чикләнсә дә, үзенә шөгыль табып яшәүче, көчле рухлы кеше. Очрашуда катнашучылар Әфганстан җирендә булган вакытларны искә төшерделәр, бүгенге көнкүреш турында фикер алыштылар.