Буалар саны артачак
Әлки “Мелиорация” “ПМК” җәмгыятендә сезонлы эшләрдә кулланылачак техниканы ремонтлау дәвам итә.
Биредә 3 скреперны, шулкадәр үк Т-130 тракторларын, 2 кранны һәм 4 “КамАЗ” автомобилен ышанычлы эшләрлек итеп төзәтеп куярга ашыгалар. Ә запас частьләрне бәяләре артканчы дип ел ахырында ук алып куйган булганнар. Машина-тракторлар механик Гакыйль Минсафин җитәкчелегендә сафка бастырыла. Инженер Әгъзам Мөрсәлимов район буаларының торышын тикшереп тора. Шөкер, язгы ташу аларга зыян китермәгән. Сүз уңаеннан: быел буалар саны тагын артырга тиеш, чөнки “Мелиорация” егетләре “Хузангай” кооперативы һәм “Тяминов” крестьян фермер хуҗалыгы өчен 2 буа төзергә җыеналар. Татар Суксуы бинасын да ремонт көтә.