Новости за 04.10.2021

Жьҭаара 4 рзы Апарламент аҿы ирыцырҵеит цәыббра 30 рзы Аҟәа аԥшаҳәаҿы иҟалаз амилициааи, адепутати, аветеранцәеи реидыслара иазкыз ахцажәарақәа.

Гал араион аҟны адгьылқәа ринвентаризациа мҩаԥысуеит. Ари аус рнапы аларкыижьҭеи шықәсқәак ҵуеит, аха араион ахьдуу иахҟьаны, макьаназы ахыркәшарахь изымнеиӡацт. Араион агроном хада Лери Шьониа еиҭеиҳәеит ас еиԥш аҭҵаарақәа зақәнагоу, лассы-лассы иахьынӡамҩаԥгатәу.

Аепидемиа ҟалеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 28120-ҩык рҟынӡа инаӡеит, ргәы бзиахеит 23106-ҩык ауааԥсыра, рыԥсҭазаара иалҵит 421-ҩык.

2021 шықәса иаалагазар, аҳәынҭқарратә ҳәаа ахысраан ашьҭазаара змаз 150-ҩык аанкылоуп.

Аҽыбӷаҟазаратә Федерациа аӡбаҩ хада Џьарназ Бениа арадио Sputnik аефир аҟны еиҭеиҳәеит Краснодартәи атәылаҿацә аҟны ишымҩаԥысыз аҽырыҩрақәеи уаҟа Аԥсны ахьӡала иқәгылаз аҽыҩқәа иаадырԥшыз алҵшәақәеи ртәы.

Аҽырыҩратә мшы аҳәаақәа ирҭагӡаны имҩаԥысит арабтәи ахалтекинтәи ҳәа изышьҭоу аҽыжәлахкқәа реиндаҭларақәа жәаба.

Аԥсны Ауаажәларратә палата иагәҭакуп Апарламент адепутати, аибашьра аветеранцәеи, амилициа аиҳабыреи рыбжьара иҟалаз ахҭыс ауаажәларратә хылаԥшра арҭарц.

Ауаажәларратә палата алахәыла, журналист Руслан Ҳашыги аполитолог Беслан Ҳагбеи арадио Sputnik аефир аҟны иазааҭгылеит цәыббра 30 ауха Аҟәа аҭыԥ змаз аидыслара, уи иахҟьаны ишьақәгылаз аҭагылазаашьа.

Аԥсны жәлар Рџьынџьтәылатә еибашьраан агәыԥ "Сатурн-Ураган" иалаз, Леон иорден занашьоу Џьумбер Бениа иахьа иԥсы ҭазҭгьы, ихыҵуан 54 шықәса.

Цәыббра 30 ауха Апарламент адепутат Гарри Кокаиеи, Аӡҩыбжьа ақыҭантәи аибашьра аветеранцәеи, Аҩнуҵҟатәи аусқәа рминистр Дмитри Дбари инапаҵаҟа иҟаз ауааи рыбжьара иҟалаз аидыслара аҭҵаара иаҿуп Аԥсны Апокуратура хада.

Аиҳабыратә хыбрақәа шьыжьаахыс изыхьчо азинхьчаратә усзуҩцәа рҭыԥ аҿы иҟоуп.

Жьҭаара 4 рзы Аԥсны ахада Аслан Бжьаниеи Аӡҩыбжьа ақыҭа ахаҭарнакцәеи аиԥылара рыман.

Апарламент аԥхьа еизаз ауаа аветеранцәа рыпҟара аганахь ала ирыдкылоу ауснагӡатәқәа ирықәшаҳаҭым..

Апарламент аԥхьа еизаз ауаа аимпра мап ацәыркуеит Аԥсны аҩнуҵҟатәи аусқәа рминистр Дмитри Дбар имаҵура зынӡа дамрымхыкәа.

Аԥсны ахада Аслан Бжьаниа Москва иусутә ныҟәара аанкыланы Аԥсныҟа дхынҳәит Аҟәа аԥшаҳәаҿы цәыббра 30 рзы иҟалаз аимак аҵыхәала.

Жьҭаара 4 азы Аԥсны Апарламент аҿы имҩаԥысит аветеранцәеи, адепутатцәеи, амилициа аусзуҩцәеи злахәыз ахҭыс иазкыз аусутә еилацәажәара.

Гарри Кокаиа иҳәеит аусҭҵаара аус шациуа, адепутатра инаҭо аламкьысратә ҭагылазаашьа ихы иаирхәарц игәыы ишҭам.

Жьҭаара 4 азы Аԥсны Апарламент аҿы имҩаԥысуеит Апрокуратура хадеи Аԥсны АШәМеи рхаҭарнакцәа злахәу аусутә еилацәажәара.

Цәыббра 30 ауха Апарламент адепутат Алмасхан Арӡынба Аԥсны ААР ахыбрахь днеины закәаншьаҭада имаз автомат "Калашников" ала ахысра далагеит, анаҩс аҭыԥ аҟынтәи дыбналеит ҳәа уаанӡа иаанацҳауан Аԥсны ААР апресс-маҵзура.

Аԥсны ахада Аслан Бжьаниа аҩнуҵҟатәи аусқәа рминистр Дмитри Дбар ахҭыс аҭҵаара иахьынӡаҿу имаҵураҟынтә ихы дақәиҭитәит. Дбар агәыӷра ааирԥшит ахҭыс иалахәыз адепутатцәагьы убасҵәҟьа рхы мҩаԥыргап ҳәа.

Аусҭҵаара мҩаԥысуанаҵы ахҭыс иалахәуыз амилициа аусзуҩцәа рнапынҵақәа ирымхәуп. Аҳәынҭқарра ахада Аԥсны ААР аминистр Дмитри Дбар аамҭалатәи иԥхьатәара идикылеит.

Аԥсны Апарламент аҿы аилацәажәара цоит, иҟалоит уи ашьҭахь изаамҭанытәим аилатәара мҩаԥгахар.

Шьыжьнаҵы Аԥсны аиҳабыратә хыбрақәа рҿаԥхьа азинмчратә усбарҭақәа русзуҩцәа гылоуп. Апарламент аҿы имҩаԥысраны иҟоуп изаамҭанытәим аилатәара.

Жьҭаара хԥа рзы Аԥсны иазгәарҭеит еиҳа пату зқәу иргәаҟыз Аԥшьа Евстафи Аԥсилтәи игәалашәара амш.

Мықә ақыҭан инхо Русҭам Багаҭелиа арадио Sputnik аефир аҟны дазааҭгылеит иахьатәи ақыҭа абзазашьа, ахныҟәгашьа атәы.