Титиев Аюбна тIехIоьттина Гребенщиков Борис

Amnesty International организацица юкъаметтигаш лелочу оьрсийн иллиалархочо Гребенщиков Бориса дIахьедина, Нохчийчохь кхел ечу Титиев Аюбна ша гIо лоцуш хиларх. Бакъонашларъяран "Мемориал" центро бина и хаам шинаридийнахь.


Маршо Радионо яздира шен агIонашкахь, наркотикаш лелош хилла аьлла, бехке а вина, Дечкен-баттахь дуьйнна чохь латточу Соьлжа-ГIаларчу "Мемориалан" офисан куьгалхочух Титиев Аюбах лаьцна. Титиевс шена дохку бехкаш тIе ца дуьту, наркотикаш полисхоша шена тесна ю боху цо.


"Мемориало" зорбане даьккхина, Amnesty International организацин логотип а, Титиевн сурт а тIехь долу кехат карахь Гребенщиковн сурт. Телеграм-канале даьккхинчу вукху сурт тIехь зорба тоьхна артистан текстна. "Ницкъ а, собар а лойла хьуна! Тхо хьоьца ду. Серлоно даим а эшабо бода. Дала Iалашвойла хьо. Г.Б", - аьлла, яздина иллиалархочо ша бакъонашларъярхочуьнга бинчу кхайкхамехь.


Карладоккху, 2004-чу шарера схьа ву Гребенщиков Борис  Amnesty International организацица юкъарлонаш лелош.