აშშ აპირებს სანქციები დაუწესოს რუს მილიარდერებს

აშშ გეგმავს რუსეთს დაუწესოს ახალი სანქციები, რომლებიც ამჯერად, მიმართული იქნება პრეზიდენტ პუტინთან ახლო კავშირის მქონე მილიარდერების წინააღმდეგ. სააგენტო Reuters-ი და გაზეთი Washington Post-ი ამერიკელ ჩინოვნიკებზე დაყრდნობით იუწყებიან, რომ აშშ-ის პრეზიდენტის 2016 წლის არჩევნებში მოსკოვის ჩარევის გამო, სანქციები ამოქმედდება რუსეთის სულ მცირე 6 მოქალაქის წინააღმდეგ ე.წ. კრემლის სიიდან, რომელიც იანვარში გამოაქვეყნა აშშ-ის ფინანსთა სამინისტრომ. ამ ჩამონათვალშია 200-ზე მეტი პოლიტიკოსი, ბიზნესმენი და ოლიგარქი. მათ შორის არიან სახელმწიფო კომპანიების „გაზპრომ“-ის და „როსნეფტ“-ის მმართველები, ალექსეი მილერი და იგორ სეჩინი და სხვა რუსი მილიარდერები. Reuters-ის ინფორმაციით, აშშ 5 აპრილს გამოაცხადებს რუსეთის წინააღმდეგ ახალი სანქციების დაწესების გადაწყვეტილებას, Washington Post-ის ცნობით კი, ეს 6 აპრილს მოხდება. საპრეზიდენტო არჩევნებში ჩარევის გამო, აშშ-ის ფინანსთა სამინისტრომ 15 მარტს სანქციები დაუწესა რუსეთის 19 მოქალაქეს და 5 ორგანიზაციას, მათ შორის უშიშროების ფედერალურ სამსახურს და სამხედრო დაზვერვის მთავარ სამმართველოს, „ტროლების ფაბრიკის“ სახელით ცნობილ „ინტერნეტ-გამოკვლევების სააგენტოს“ და პრეზიდენტ პუტინთან დაახლოებულ პირად მიჩნეულ ბიზნესმენს, ევგენი პრიგოჟინს.