ეკონომიკის სამინისტრო: გაზრდილი მოთხოვნა ელექტროენერგიაზე ადგილობრივი გენერაციით უნდა დაკმაყოფილდეს
საქართველოს ეკონომიკისა და მდგრადი განვითარების სამინისტრო 24 აპრილს გავრცელებულ განცხადებაში წერს, რომ საქართველოს მთავრობის უმთავრესი მიმართულება ქვეყნის ენერგეტიკული უსაფრთხოებისა და დამოუკიდებლობის ხარისხის ამაღლება და იმპორტირებულ ენერგორესურსებზე დამოკიდებულების ეტაპობრივი შემცირებაა - ადგილობრივი ენერგეტიკული რესურსების ათვისების, მიწოდების წყაროებისა და მარშრუტების დივერსიფიკაციის გზით.
ეკონომიკის სამინისტროს განმარტებით, ენერგეტიკის განვითარების სტრატეგია განსაზღვრულია ასოცირების ხელშეკრულებით აღებული ვალდებულებებით, რაც მოიცავს სამ ძირითად ამოცანას
ბაზრის დერეგულირება,
მწვანე განახლებადი ენერგიის განვითარება
ენერგოეფექტურობა.
„ეს ასახულია საკანონმდებლო ინიციატივების პაკეტში“, - განმარტავს სამინისტრო.
ეკონომიკის სამინისტროს ინფორმაციით, მომავალში ეკონომიკური ზრდა გამოიწვევს ელექტროენერგიის მოთხოვნის ზრდას და გრძელვადიან პერსპექტივაში ის 4,5%-ს გაუტოლდება. მათი განცხადებით, არსებობს არაერთი კვლევა, რომლებიც ადასტურებს, რომ 2030 წელს საქართველოს ელექტროენერგიის მოთხოვნა 21-22 მილიარდ კილოვატ საათს მიაღწევს, რაც დაახლოებით 8 მილიარდი კილოვატ საათით მეტია ქვეყნის არსებულ გენერაციაზე.
„ეს ზრდა ადგილობრივი გენერაციით უნდა დაკმაყოფილდეს და ამას ალტერნატივა არ გააჩნია“, - წერია განცხადებაში.
განცხადებაში ასევე წერია, რომ ენერგეტიკისა და წყალმომარაგების შესახებ ახალი კანონპროექტი რამდენჯერმე განიხილეს როგორც განახლებადი ენერგიების განვითარების ასოციაციის წევრებთან, ასევე ენერგეტიკის სფეროში მოქმედ არასამთავრობოებთან და სხვა დაინტერესბულ პირებთან.
„ჩართულობა მათ აძლევდათ საშუალებას ჰქონოდათ შენიშვნები და მოსაზრებები, რისი ასახვაც მოხდა კანონპროექტში და სწორედ ამის შემდეგ, როცა ყველა მხარესთან შეჯერდა, გადაეგზავნა მთავრობას დასამტკიცებლად“, - წერს ეკონომიკის სამინისტრო.