ახალქალაქის ინციდენტის დროს დაკავებული პირები გაათავისუფლეს
6 ივნისს, დაახლოებით 17:00 საათზე, ახალქალაქში პოლიციელებსა და ადგილობრივებს შორის მომხდარ დაპირისპირებასთან დაკავშირებით თვითმხილველებმა გაავრცელეს ვიდეომასალა, სადაც ჩანს, რომ პოლიციელებს „მერსედესის“ მარკის ავტომობილიდან ძალის გამოყენებით გადმოჰყავთ მძღოლი და მიწაზე აგდებენ. ვიდეოკადრებს Jnews-ი ავრცელებს.
ავტომობილის მძღოლს ამ დროს ბიძა გამოესარჩლა, რომელიც იქვე ახლოს ცხოვრობს. პოლიციამ მისი დაკავება სცადა, რა დროსაც ის შეუძლოდ გახდა. ასაკოვანი მამაკაცი ამჟამად ახალქალაქის „ევექსის“ ქსელის კლინიკაშია გადაყვანილი. ექიმების თქმით, მას მაღალი არტერიული წნევა აღენიშნებოდა და კვლევის ჩასატარებლად კლინიკაში 24 საათის განმავლობაში დარჩება.
ინციდენტის შემდეგ, მალევე მომხდართან დაკავშირებით განცხადება გააკეთა შინაგან საქმეთა სამინისტროს პრესსამსახურმა.
„სამცხე-ჯავახეთის საპატრულო პოლიციის მთავარი სამმართველოს თანამშრომლებმა ახალქალაქში გააჩერეს მძღოლი, საგზაო მოძრაობის წესების დარღვევის გამო. ადმინისტრაციული წესით დაჯარიმების პროცესში, რამდენიმე ახალგაზრდამ მძღოლის მხარდაჭერის მიზნით, წინააღმდეგობა გაუწია საპატრულო პოლიციის თანამშრომლებს. მათ პოლიციელებს თავდაპირველად სიტყვიერი შეურაცხყოფა მიაყენეს, შემდეგ კი ფიზიკური წინააღმდეგობაც გაუწიეს“.
უწყება იტყობინებოდა, რომ პოლიციისთვის წინააღმდეგობის გაწევისთვის (სს კოდექსის 178-ე მუხლი) და წვრილმანი ხულიგნობისთვის (სს კოდექსის 166-ე მუხლი) პოლიციამ ახალქალაქში ადმინისტრაციული წესით ორი მოქალაქე დააკავა და ისინი პოლიციის განყოფილებაში გადაიყვანეს.